ახალი კანონპროექტი რადიომაუწყებლების ლიცენზიების 2031 წლამდე გაგრძელებას ითვალისწინებს
საქართველოს პარლამენტში ქართული ოცნების დეპუტატების მიერ ინიცირებულია კანონპროექტი, რომელიც რადიომაუწყებლების ლიცენზიების მოქმედების ვადის 2031 წლის 31 დეკემბრამდე ერთჯერადად გაგრძელებას ითვალისწინებს.
განმარტებითი ბარათის მიხედვით, 30-ზე მეტ რადიომაუწყებელ კომპანიას 2026 წლის 31 დეკემბერს ეწურება მოქმედი ლიცენზიების ვადა, რომელიც მათ 2021 წელს შეტანილი საკანონმდებლო ცვლილების საფუძველზე გაუგრძელდათ. არსებული კანონმდებლობა კი ლიცენზიის მეორედ გაგრძელების შესაძლებლობას არ ითვალისწინებს.
დოკუმენტში აღნიშნულია, რომ მოქმედი წესით ლიცენზიის ვადის გასვლის შემდეგ კომპანიებს მაუწყებლობის გასაგრძელებლად ლიცენზიის კონკურსის წესით მოპოვება მოუწევთ. განმარტებითი ბარათის თანახმად, კონკურსები გაფართოებულ რადიოსამაუწყებლო ზონებში უნდა გამოცხადდეს, რაც დამატებითი და უფრო მძლავრი ინფრასტრუქტურის მოწყობას საჭიროებს. მათივე განმარტებით, ეს რადიომაუწყებლებისთვის მნიშვნელოვან ფინანსურ და დროით ტვირთს წარმოადგენს, რომლის გაწევის შესაძლებლობაც რადიო კომპანიებს ამჟამად არ აქვთ.
კანონპროექტის ავტორები ასევე მიუთითებენ რადიოსექტორის ფინანსურ მდგომარეობაზე. საქართველოს კომუნიკაციების ეროვნული კომისიის ანალიტიკურ პორტალზე დაყრდნობით, 2025 წელს რადიოსამაუწყებლო კომპანიების შემოსავლები 2024 წელთან შედარებით 16%-ით შემცირდა, ხოლო სარეკლამო შემოსავლები 9%-ით. ამავე დოკუმენტის მიხედვით, რადიომაუწყებლების საერთო შემოსავალი მაუწყებლობის სფეროს მთლიანი შემოსავლის მხოლოდ 6.6%-ს შეადგენს, ხოლო სარეკლამო შემოსავლების წილი – 7.1%-ს.
კანონპროექტის თანახმად, ლიცენზიის მოქმედების ვადა 2031 წლის 31 დეკემბრამდე გაგრძელდება. მაუწყებელმა შესაბამისი განცხადებით საქართველოს კომუნიკაციების ეროვნულ კომისიას ლიცენზიის ამოწურვამდე ერთი თვით ადრე უნდა მიმართოს. გადაწყვეტილება კი მარტივი ადმინისტრაციული წარმოების წესით იქნება მიღებული.
დოკუმენტის მიხედვით, ვადის გაგრძელების შემთხვევაში ლიცენზიის მფლობელები გადაიხდიან სალიცენზიო გადასახდელსა და მოსაკრებელს. განმარტებითი ბარათის თანახმად, თუ ვადის გაგრძელებით ყველა შესაბამისი რადიომაუწყებელი ისარგებლებს, სახელმწიფო ბიუჯეტში დაახლოებით 800 ათასი ლარი შევა. აქედან 33 ათასი ლარი სალიცენზიო მოსაკრებელი იქნება, ხოლო დაახლოებით 767 ათასი ლარი - სალიცენზიო გადასახდელი.