ალბანეთში ტრამპის სიძის, ჯარედ კუშნერის მდიდრული კურორტის პროექტს იძიებენ

ალბანეთის ანტიკორუფციულმა პროკურატურამ აშშ-ის პრეზიდენტის სიძესთან, ჯარედ კუშნერთან დაკავშირებული მდიდრული კურორტის პროექტზე გამოძიება დაიწყო.

როგორც ირკვევა, საგამოძიებო უწყება 2024 წელს დაცული ტერიტორიის სტატუსისა და მიწის საკუთრების საკამათო ცვლილებებს სწავლობს. სწორედ ამ გადაწყვეტილებებმა მისცა ინვესტორს საშუალება, იქამდე აკრძალულ ზონაში კურორტის მშენებლობა დაეწყო. არსებობს ვარაუდი, რომ საქმეში კორუფციის ნიშნები გამოიკვეთება.

რაც შეეხება თავად პროექტს, ჯარედ კუშნერის მფლობელობაში არსებული საინვესტიციო ფონდი, Affinity Partners-ი ადრიატიკის ზღვის კუნძულსა და ვოისა-ნარტას დაცულ ტერიტორიაზე მდიდრული კომპლექსის მოწყობას გეგმავს. ინიციატივის მიხედვით, აღნიშნულ ზონაში 10,000 სასტუმრო ნომერი უნდა აშენდეს.

აღსანიშნი ფაქტია, რომ პროკურატურის გამოძიების პარალელურად, პროექტის სავარაუდო ლოკაციაზე უკვე რამდენიმე დღეა მოქალაქეები და გარემოსდაცვითი ორგანიზაციები საპროტესტო აქციებს მართავენ. ვითარება დეველოპერების მიერ ტერიტორიაზე მავთულხლართებიანი ღობეების აღმართვის შემდეგ გამწვავდა. ამ გადაწყვეტილებით მოსახლეობას სანაპიროზე წვდომა შეეზღუდა. შაბათს მომხდარი დაპირისპირების ამსახველი კადრების მიხედვით, კერძო დაცვის თანამშრომლებმა ერთ-ერთ დემონსტრანტზე იძალადეს კიდეც. საგულისხმო ფაქტია, რომ ინციდენტის შემდეგ, ალბანეთის ხელისუფლებამ კერძო დაცვის ორ კომპანიას ლიცენზია ჩამოართვა. სამართალდამცველებმა ერთი პირი დააკავეს, ხოლო ადგილობრივი პოლიციის უფროსი თანამდებობიდან გაათავისუფლეს.

რაც შეეხება ხელისუფლების ოფიციალურ პოზიციას, ალბანელ კანონმდებლებთან შეხვედრისას პრემიერ-მინისტრმა ედი რამამ კატეგორიულად უარყო ცნობები იმის შესახებ, რომ პროექტი დაცულ ტერიტორიაზე განხორციელდება და ადგილობრივ ველურ ბუნებას საფრთხეს შეუქმნის. მთავრობის მეთაურის განმარტებით, საბოლოო წინადადება ჯერ წარდგენილიც კი არ არის და არც გარემოსდაცვითი კვლევაა დასრულებული. საყურადღებოა, რომ მიმდინარე პროცესებზე ჯერჯერობით კომენტარი თავად კუშნერის Affinity Partners-ს არ გაუკეთებია.