ალექსანდრ ვუჩიჩის თბილისში ვიზიტი დაიწყო - მხარეები თავისუფალი ვაჭრობის შეთანხმებაზე მოლაპარაკებებს გამართავენ

საქართველოს ოფიციალური ვიზიტით სერბეთის რესპუბლიკის პრეზიდენტი ალექსანდარ ვუჩიჩი, მეუღლესთან და სახელმწიფო დელეგაციასთან ერთად ეწვია.

როგორია ეკონომიკური ურთიერთობები სერბეთთან?

შოთა რუსთაველის სახელობის თბილისის საერთაშორისო აეროპორტში სერბეთის პრეზიდენტს საქართველოს ეკონომიკისა და მდგრადი განვითარების მინისტრი მარიამ ქვრივიშვილი დახვდა. მინისტრის განცხადებით, ეს არის ისტორიული მომენტი, რადგან სერბეთის პრეზიდენტი საქართველოს პირველად სტუმრობს.

მარიამ ქვრივიშვილის განმარტებით, ამ ვიზიტს განსაკუთრებული დატვირთვა აქვს ორ ქვეყანას შორის სავაჭრო-ეკონომიკური ურთიერთობების გამყარებისთვის, რადგან თბილისსა და ბელგრადს შორის მიმდინარეობს მოლაპარაკებები თავისუფალი ვაჭრობის შეთანხმების გაფორმებაზე.

„ვფიქრობთ, რომ ეს იქნება პრეცედენტული გადაწყვეტილება, რომ ასეთ მოკლე დროში ორი სახელმწიფო გააფორმებს თავისუფალი ვაჭრობის შეთანხმებას, რაც ხელს შეუწყობს ქვეყნებს შორის სავაჭრო-ეკონომიკურ ურთიერთობებს, გაზრდის საქართველოდან ექსპორტს, რაც, რა თქმა უნდა, მნიშვნელოვანი იქნება ჩვენი ქვეყნის ეკონომიკის შემდგომი განვითარებისთვის“, - განაცხადა მარიამ ქვრივიშვილმა.

მისი თქმით, ვიზიტის ფარგლებში დაგეგმილია უმნიშვნელოვანესი ორმხრივი შეხვედრები, მათ შორის ქვეყნის ლიდერებს შორის, რაც ხელს შეუწყობს მხარეებს შორის მიმდინარე მოლაპარაკებების პროგრესს.