Alibaba-ს EBITDA 84%-ით შემცირდა

ჩინური ტექნოლოგიური გიგანტის, Alibaba-ს შემოსავალმა გასულ კვარტალში 243.38 მილიარდი იუანი ($35.84 მლრდ.) შეადგინა. აღნიშნული მაჩვენებელი გასული წლის ანალოგიურ პერიოდთან შედარებით 3%-ით გაიზარდა, თუმცა პროგნოზირებულ 247.22 მილიარდ იუანს ჩამორჩა. Reuters-ის ცნობით, კომპანიის კორექტირებული EBITDA 84%-ით შემცირდა, წმინდა მოგება კი 99.7%-ით დაეცა. როგორც ირკვევა, ფინანსური მაჩვენებლების მკვეთრი კლება ხელოვნურ ინტელექტსა და სწრაფი მიწოდების სერვისებზე გაზრდილმა ხარჯებმა განაპირობა.

რაც შეეხება Alibaba-ს კონკრეტულ სექტორებს, Cloud Intelligence Group-ის შემოსავალი 38%-ით გაიზარდა და 41.63 მილიარდი იუანი ($6.13 მლრდ.) შეადგინა. რაც შეეხება ჩინეთის ელექტრონული კომერციის მიმართულებას, მან კომპანიას 122.22 მილიარდი იუანის ($18 მლრდ.) შემოსავალი მოუტანა. საყურადღებოა, რომ ამ მხრივ შედეგებმა ანალიტიკოსების მიერ წინასწარ განსაზღვრულ მოლოდინებს გადააჭარბა.

კვარტალური შედეგების გამოქვეყნების შემდეგ Alibaba-ს აქციების ფასი 1%-ით შემცირდა. ამჟამად მისი ერთი აქცია $80.20-ად იყიდება, კაპიტალიზაცია კი $192.45 მილიარდს შეადგენს.

ცნობისთვის, Alibaba ჩინური ტექნოლოგიური კონგლომერატია, რომელიც ელექტრონული კომერციის, ღრუბლოვანი სერვისებისა და ციფრული გადახდების მიმართულებით მუშაობს. ის ქვეყნის საცალო ვაჭრობის ონლაინ ბაზრის უდიდეს წილს აკონტროლებს.