"ამ კანონპროექტზე მომუშავე უწყება არ ვართ" - ლექვინაძე "არასამართლებრივი სავაჭრო პრაქტიკის ჩარჩო დოკუმენტის" შემუშავებაზე

კონკურენციისა და მომხმარებლის დაცვის სააგენტოს ხელმძღვანელის განცხადებით, დღეისთვის სააგენტო იმპორტიორს, დისტრიბუტორსა და ქსელებს შორის ინსტიტუციური ურთიერთობის ჩარჩოს შექმნაში ჩართული არ არის. თუმცა ირაკლი ლექვინაძე აღნიშნავს, რომ ამ კანონის მიღების შემდეგ თუ მისი აღსრულება GCCA-ს დაევალება, ისინი ამისთვის მზად იქნებიან.

საქმე ის არის, რომ "ფასების საპარლამენტო კომისიის" ერთ-ერთი რეკომენდაცია სწორედ მწარმოებელს, იმპორტიორს, დისტრიბუტორსა და ქსელებს შორის ინსტიტუციური ურთიერთობის ჩარჩოს შექმნაა. რომელიც ევროკავშირში არსებული “არასამართლიანი სავაჭრო პრაქტიკის შესახებ დირექტივის”, შესაბამისი იქნება. ამ დირექტივის ფარგლებშიც არაერთი მსგავსი ცვლილება დაინერგა სტრუქტურულად, რომ ბაზარზე მოთამაშეებს შორის ურთიერთობების ასიმეტრია გასწორებულიყო და სავაჭრო ურთიერთობები სამართლიანი, გამჭვირვალე და ეფექტური გამხდარიყო.

აქედან გამომდინარე BM.GE-მ ირაკლი ლექვინაძეს ჰკითხა თუ იყო საქმის კურსში რაზე მუშაობდა ეკონომიკის სამინისტრო და როდის იქნება ეს დოკუმენტი ხელმისაწვდომი?

„რა ინფორმაციაც გვაქვს, ეს არის იგივე დისტრიბუტორებსა და სუპერმარკეტის ქსელებს შორის სამართლიანი ვაჭრობის შესახებ სამართლებრივი ჩარჩო კანონის ფორმირება, რომელიც ევროპაში და ევროპულ ქვეყნებშია, სადაც მსგავსი ტიპის პრობლემატიკა იყო. ეს ჩარჩო უზრუნველყოფს სამართლიან წესებს ქსელებსა და მიმწოდებლებს შორის და განსაკუთრებით იმ მიმწოდებლების დაცულობას უზრუნველყოფს, რომლებიც მცირე, ფერმერული მეურნეობები, ასევე სტარტაპები არიან. ამ ეტაპზე ვერ გეტყვით, იმიტომ რომ ჩვენ ამ კანონპროექტზე მომუშავე უწყება არ ვართ. თუმცა თუ აღნიშნული კანონპროექტის მიღება გადაწყდება და მისი აღსრულება კონკურენციისა და მომხმარებლის დაცვის სააგენტოს დაევალება, ბუნებრივია მზაობას გამოვთქვამთ, იმიტომ რომ ჩვენ არაერთ დისკუსიაში ვმონაწილეობდით, რომელიც აღნიშნული საკითხის განხილვას თუ შემდგომში განვითარებას ეხება“, - განაცხადა ლექვინაძემ.