„ამ ქვეყანაზე უფასო არაფერია, მით უმეტეს ელექტროენერგია“ - ვიქტორ ჯაფარიძე მესტიის გამრიცხველიანებაზე

საპარლამენტო პოლიტიკური ჯგუფის „ხალხის ძალის“ დეპუტატის ვიქტორ ჯაფარიძე მესტიის გამრიცხველიანების გადაწყვეტილებას იწონებს და ამბობს, რომ კრიპტომაინინგის პრობლემა მოსაგვარებელია.

საქმე ის არის, რომ ირაკლი კობახიძემ 4 ივნისს განაცხადა, რომ მაღალმთიან მხარეში აღნიშნული პრობლემის გადასაჭრელად მთავრობის წარმომადგენლებმა სხვა დეპუტატებთან ერთად ვიქტორ ჯაფარიძესთანაც ისაუბრეს და პრობლემასთან ბრძოლის რთული გადაწყვეტილება ერთად მიიღეს. აქედან გამომდინარე BM.GE დეპუტატის პოზიციით დაინტერესდა.

ვიქტორ ჯაფარიძე, მესტიაში უკანონო კრიპტომაინინგის პრობლემის გადაწყვეტის საკითხში მონაწილეობას ადასტურებს და ამბობს, რომ მისი და სოზარ სუბარის ჩართულობა ამ საკითხების მოგვარებისას „უპრიანია იყო".

დეპუტატმა მესტიაში უკანონო კრიპტომაინინგთა ბრძოლისა და მოსახლეობის გამრიცხველიანების მნიშვნელობაზე ისაუბრა და განაცხადა: „უფასო არის მკვდრისთვის კუბო... თორემ ოჯახის პატრონი მაგასაც ყიდულობს. უფასო არაფერი არსებობს ამ ქვეყანაზე მით უმეტეს ელექტროენერგია“.

მან აღნიშნა, რომ ელექტროენერგიის ჭარბი მოხმარება მესტიას წლების განმავლობაში აწუხებდა და ბიზნესს ოპერირებაში ხელს უშლიდა, რაზედაც მისი თქმით, მოსახლეობასთან არაერთი შეხვედრა ჰქონია და გაფრთხილებაც მიუცია.

“რაღაცა ბუშტი იბერება, იბერება და ბოლოს გასკდება - ყველაფერს აქვს ზღვარი, რაღაცა არ შეიძლება, რაღაცა შეიძლება.

მე, ვიქტორ ჯაფარიძე ამის [გამრიცხველიანების] წინააღმდეგი ვერ ვიქნები. არ მომწონს ის ადამიანები, ვინც სვანეთს ვნებენ... არ შეიძლება - ზამთარში დენი ითიშება, არის პრობლემები, ტრანსფორმატორები ფეთქდება, „ენერგო-პრო“ ვერაფერს აკეთებს, იმიტომ კი არა რომ არ უნდა, იმიტომ, რომ ცოტა რთულია კაპიტალდაბანდება, როცა დენი უფასოა“, - განაცხადა ჯაფარიძემ.

კითხვაზე - იქნება თუ არა მოსახლეობა მზად გამრიცხველიანებისთვის, „ხალხის ძალის“ დეპუტატი ყურადღებას მთავრობის მხრიდან აღებულ სოციალურ პასუხისმგებლობაზე ამახვილებს და ამბობს, რომ გასათვალისწინებელია ისიც, რომ მესტიაში გაზმომარაგება არ არის.