აპრილში ხორცპროდუქტების ფასი 10%-ით, თევზის 21.3%-ით გაიზარდა - დეტალური სტატისტიკა

საქართველოში ინფლაციის დონე იზრდება. საქსტატის მიერ გამოქვეყნებული აპრილის ანგარიშის მიხედვით, წლიურმა ინფლაციამ 5.9% შეადგინა, ხოლო წინა თვესთან (მარტთან) შედარებით ფასები 1.7%-ით არის მომატებული.

ინფლაციის ფორმირებაზე ყველაზე დიდი გავლენა კვლავ სურსათისა და უალკოჰოლო სასმელების ჯგუფმა მოახდინა — აქ ფასები წლიურად 7.5%-ით გაიზარდა. განსაკუთრებით თვალსაჩინოა ფასების მატება ცილოვანი პროდუქტების (თევზი, ხორცი) ქვეჯგუფებში.

სტატისტიკური მონაცემებით, თევზეულის ქვეჯგუფში ფასები წლიურად 21.3%-ით არის გაზრდილი, ხოლო ხორცის პროდუქტები 10.1%-ით გაძვირდა.

bm.ge გთავაზობთ ამ ქვეჯგუფებში შემავალი კონკრეტული პროდუქტების ფასების ცვლილების წლიურ დეტალურ ჩამონათვალს:

თევზეული:

• შებოლილი თევზი: ფასი გაიზარდა 26%-ით; • ახალი თევზი: ფასი გაიზარდა 24%-ით; • გაყინული თევზი: ფასი გაიზარდა 17.6%-ით. • თევზის კონსერვის ფასი კი 0.2%-ით არის შემცირებული.

ხორცი და ხორცის პროდუქტები:

• საქონლის ხორცი: ფასი გაიზარდა 19.1%-ით; • ძროხის ხორცის ფარში: ფასი გაიზარდა 14.9%-ით; • მოშუშული ხორცის კონსერვი: ფასი გაიზარდა 13.7%-ით; • ქათმის ხორცი: ფასი გაიზარდა 10.2%-ით; • შებოლილი ხორცი: ფასი გაიზარდა 6.3%-ით • ღორის ხორცი: ფასი გაიზარდა 5.7%-ით.

მხოლოდ ბოლო ერთი თვის (აპრილი მარტთან შედარებით) ჭრილში, სურსათის ჯგუფში ფასები 0.5%-ით გაიზარდა. თვის განმავლობაში ყველაზე მეტად ხილი და ყურძენი (3.7%), ასევე ბოსტნეული და ბაღჩეული (2.1%) გაძვირდა.

აღსანიშნავია, რომ სურსათის ჯგუფში არის პროდუქტებიც, რომლებზეც ფასი შემცირდა. მაგალითად, წინა თვესთან შედარებით მინერალური წყალი და უალკოჰოლო სასმელები 2.5%-ით გაიაფდა, ხოლო რძე, ყველი და კვერცხი 1.5%-ით.