ArcelorMittal-მა უკრაინაში საწარმოს გაჩერება და $1 მილიარდის ჩამოწერა გადაწყვიტა

ფოლადის გლობალურმა მწარმოებელმა ArcelorMittal-მა უკრაინის მთავრობას აცნობა, რომ რუსული სარაკეტო იერიშების გამო, შვილობილი საწარმოს, ArcelorMittal Kryvyi Rih-ის უსაფრთხო და მდგრად რეჟიმში აღდგენა შეუძლებელია, ამიტომ ის გაურკვეველი ვადით გაჩერდება.

ამასთან, კომპანია ქარხნის ძირითადი საშუალებების, მოწყობილობებისა და ინფრასტრუქტურის გაუფასურების გამო, დაახლოებით $1 მილიარდის ჩამოწერას გეგმავს.

ბოლო ხუთი კვირის განმავლობაში კრივოი-როგის ქარხანაზე ოთხი სარაკეტო დარტყმა განხორციელდა, რამაც საწარმოო ინფრასტრუქტურის მასშტაბური დაზიანება გამოიწვია. ბოლო იერიში 21 სექტემბერს დაფიქსირდა. თავდასხმების შედეგად ხუთი თანამშრომელი დაიღუპა, ხოლო 17 დაშავდა.

კომპანიის გენერალური დირექტორის, მაურო ლონგობარდოს განცხადებით, მენეჯმენტი უკრაინის მთავრობასთან სამომავლო ნაბიჯებს განიხილავს. ძირითადი ყურადღება ინფრასტრუქტურის კონსერვაციაზე გამახვილდება, რათა მშვიდობის დამყარების შემდეგ წარმოების აღდგენის შესაძლებლობა შენარჩუნდეს, თუმცა ამჟამად აღდგენაზე საუბარი ზედმეტია.

ცნობისთვის, ArcelorMittal-ი ფოლადისა და სამთო-მოპოვებითი მრეწველობის მსოფლიო გიგანტია, რომელიც 60 ქვეყანაში ოპერირებს და პროდუქციას 126 ქვეყნის ბაზარზე ყიდის. 2025 წელს კომპანიის შემოსავალმა $61.4 მილიარდი შეადგინა.