აშკარად აჭრილია ბატონი ფიშერი - ირაკლი კობახიძე

ირაკლი კობახიძე გერმანიის ელჩის, პეტერ ფიშერის კრიტიკულ განცხადებებს გამოეხმაურა და მათ არასერიოზული უწოდა. მისი თქმით, ელჩი პარტნიორ ქვეყნებს უარყოფით კონტექსტში მოიხსენიებს.

ირაკლი კობახიძემ გერმანიის ელჩის მისამართით აღნიშნა, რომ მისი ახალ-ახალი განცხადებების სერიოზულად შეფასება არასწორია.

„აშკარად აჭრილია ბატონი ფიშერი. სხვას ამას ვერაფერს დავარქმევთ. იმდენად არასერიოზული არის ყოველ ჯერზე მისი ახალ-ახალი განცხადებები, რომ ამ ყველაფრის სერიოზულად შეფასება, ჩემი აზრით, არასწორია. სამწუხაროა, დასანანია. თან საუბრობს ჩვენს მეგობარ ქვეყნებზე, მეგობარ ხალხებზე. საბოლოო ჯამში გამოდის, რომ მათ რაღაცნაირად უარყოფით კონტექსტში მოიხსენიებს“, - განაცხადა ირაკლი კობახიძემ.

კობახიძის ეს საპასუხო კომენტარი მოჰყვა გერმანიის ელჩის, პეტერ ფიშერის ინტერვიუს „რადიო თავისუფლებასთან“, სადაც მან აღნიშნა, რომ საქართველოს ხელისუფლებაში მყოფ პირებს, მისი აზრით, ევროკავშირში გაწევრიანება არ სურთ, თუმცა ამას ხალხს პირდაპირ არ ეუბნებიან.

გერმანიის ელჩმა ინტერვიუში ასევე დასძინა, რომ მისი ხედვით, პროცესის მიზანი მოსახლეობაში ევროკავშირის მხარდაჭერის შემცირებაა, რათა შესაძლო წარუმატებლობა თავად დასავლურ სტრუქტურებს დაბრალდეს.