აშშ ესპანეთთან სავაჭრო ურთიერთობებს წყვეტს - ტრამპის ბრძანება

აშშ-ის პრეზიდენტმა დონალდ ტრამპმა ესპანეთთან სავაჭრო ურთიერთობების შეწყვეტის შესახებ გადაწყვეტილება მიიღო. როგორც ირკვევა, თეთრი სახლის ლიდერმა შესაბამისი მითითება ანკარაში, ჩრდილოატლანტიკური ალიანსის წევრებთან შეხვედრამდე, აშშ-ის ფინანსთა მინისტრ სკოტ ბესენტს მისცა. ამერიკის ლიდერმა ესპანეთს "უპერსპექტივო პარტნიორი" უწოდა. მისი განცხადებით, ოფიციალური ვაშინგტონი მადრიდთან ბიზნესის წარმოებას აღარ გეგმავს.

მნიშვნელოვანია ითქვას, რომ ორ ქვეყანას შორის არსებული დაპირისპირება თავდაცვის ხარჯებს უკავშირდება. როგორც ცნობილია, გასულ წელს გამართულ ალიანსის სამიტზე მადრიდმა მხარი არ დაუჭირა ახალ გეგმას, რომელიც 2035 წლისთვის თავდაცვაზე მთლიანი შიდა პროდუქტის 5%-ის გამოყოფას ითვალისწინებს. პარალელურად, სიტუაცია ესპანეთის პრემიერ-მინისტრ პედრო სანჩესის პოზიციამაც გაამწვავა. მთავრობის მეთაურმა ტრამპის მიერ ირანთან ომის დაწყების გადაწყვეტილება კიდევ ერთხელ გააკრიტიკა და ამერიკული მხარისთვის სამხედრო ბაზების გამოყენებას აკრძალვა სწორ ნაბიჯად შეაფასა.

საყურადღებოა, რომ პრეზიდენტის მიერ გამოცემული ბრძანების აღსრულების მექანიზმები კვლავ ბუნდოვანი რჩება, რადგან ესპანეთი ევროკავშირის შემადგენლობაში შედის. თუმცა, როგორც Politico წერს, სავარაუდოა, რომ შტატები ეკონომიკურ აქტივობას უშუალოდ მადრიდიდთან შეზღუდავს.

ცნობისთვის, ბოლო ოფიციალური მონაცემებით აშშ-სა და ესპანეთს შორის ორმხრივი სავაჭრო ბრუნვა $48.3 მილიარდს შეადგენდა. ძირითადი პროდუქცია, რომლითაც ორი ქვეყანა ვაჭრობს, ნავთობი, დაფასოებული მედიკამენტები და ზეითუნის ზეთია. აშშ-ს მხრიდან ნედლი წიაღისეული საწვავის ექსპორტის მოცულობამ 2024 წელს $6.19 მილიარდი შეადგინა, სამედიცინო პრეპარატებისამ კი - $4.24 მილიარდი. რაც შეეხება ესპანური პროდუქციის ექსპორტს, ამ მხრივ ზეითუნის ზეთი ლიდერობს, $1.13 მილიარდით.

ჯერჯერობით 2026 წლის 6 თვის ყოვლისმომცველი სტატისტიკა გამოქვეყნებული არ არის, თუმცა ანალიტიკოსები აღნიშნავენ, რომ აშშ-ირანის ომის ფონზე მადრიდსა და ვაშინგტონს შორის დაპირისპირების გამო ორმხრივი ვაჭრობა იკლებს. მხოლოდ აპრილის თვეში, წინა წლის ანალოგიურ პერიოდთან შედარებით, აშშ-ის ექსპორტი ესპანეთში მკვეთრად - 27.8%-ით დაეცა. ეს ვარდნა ძირითადად წიაღისეულ საწვავებზე და კომპიუტერულ ტექნიკაზე მოთხოვნის შემცირებამ განაპირობა.

თავის მხრივ, აშშ-ის იმპორტი ესპანეთიდან 8.44%-ით შემცირდა, რაც ფარმაცევტული პროდუქტების მიწოდების მკვეთრმა კლებამ გამოიწვია.