აშშ გრენლანდიაში ორ სამხედრო ბაზას ხსნის - შეთანხმება კოპენჰაგენთან და ნუუკთან უკვე გაფორმდა

ამერიკის შეერთებულმა შტატებმა დანიასთან და გრენლანდიასთან გააფორმა უსაფრთხოების ახალი შეთანხმება, რომლის ფარგლებშიც კუნძულზე ორ სტრატეგიულ ბაზას აამოქმედებს.

გარიგების მიხედვით, ვაშინგტონი სამხრეთ გრენლანდიაში მდებარე „ცივი ომის“ დროინდელ ნარსარსუაკის ბაზას აღადგენს და აღმოსავლეთით მდებარე მესტერსვიგის ფორპოსტში სამხედროებს განალაგებს. როგორც დონალდ ტრამპმა შეთანხმების გაფორმების შემდეგ აღნიშნა, დადებული შედეგი ამერიკულ მხარეს არქტიკული რეგიონის უსაფრთხოებაზე „მუდმივ კონტროლს“ მიანიჭებს. თეთრი სახლის ლიდერის განცხადებით, დოკუმენტი აშშ-ის ყველა ძირითად ინტერესს ყოველგვარი დამატებითი ხარჯების გარეშე აკმაყოფილებს.

აღსანიშნავია, რომ ორივე ობიექტს რეგიონში განსაკუთრებული სტრატეგიული დატვირთვა აქვს. პირველი ობიექტი ნარსარსუაკის აეროდრომია. ცნობისთვის, იმ დასახელებულ პუნქტში, სადაც ამერიკულმა მხარემ სამხედრო ბაზა Bluie West One-ი ჯერ კიდევ 1950-იან წლებში დახურა, ამჟამად მხოლოდ რამდენიმე ათეული ადამიანი ცხოვრობს.

რაც შეეხება მეორე ობიექტს - მესტერსვიგის ფორპოსტს, მას აქამდე დანიის სპეციალური დანიშნულების რაზმი, „სირიუსის პატრული“ ძაღლების მარხილებით გადაადგილებისთვის იყენებდა. როგორც თეთრ სახლში აღნიშნავენ, ამერიკული კონტინგენტის განთავსება დანიის კუთვნილ ამ ორ საკვანძო პუნქტში არქტიკულ სივრცეში ვაშინგტონის ოპერაციულ შესაძლებლობებს მკვეთრად გააფართოებს.

აღსანიშნავია, რომ ახალი შეთანხმება არქტიკის რეგიონში ჩინეთისა და რუსეთის სამხედრო ექსპანსიის შეკავებასაც მოიცავს. დოკუმენტი იმ ქვეყნებს, რომლებიც ჩრდილოატლანტიკური ალიანსის წევრები არ არიან, გრენლანდიის ტერიტორიაზე სამხედრო ინფრასტრუქტურის შექმნასა და კრიტიკული მინერალების სექტორში ინვესტიციების განხორციელებას პირდაპირ უკრძალავს.

დანიის პრემიერ-მინისტრმა მეტე ფრედერიკსენმა ხაზი გაუსვა, რომ დოკუმენტი სამეფოს სუვერენიტეტსა და გრენლანდიელი ხალხის თვითგამორკვევის უფლებას სრულად აღიარებს.

ცნობისთვის, „ცივი ომის“ პერიოდში ამერიკის შეერთებული შტატები გრენლანდიაში 10,000-ზე მეტი სამხედრო მოსამსახურითა და 17 ობიექტით იყო წარმოდგენილი. დღეისათვის კუნძულზე მოქმედ ერთადერთ ამერიკულ ობიექტად Pituffik-ის კოსმოსური ბაზა რჩება, სადაც დაახლოებით 150 ამერიკელი სამხედრო მსახურობს.