აშშ-ის ხაზინის მდივანმა ირანთან დაკავშირებულ მსხვილი უცხოური ბანკის დასანქცირება დააანონსა

აშშ-ის ხაზინის მდივანმა, სკოტ ბესენტმა ირანის წინააღმდეგ მიმართული სტრატეგიის ფარგლებში მსხვილი უცხოური ბანკის დასანქცირება დააანონსა. ამერიკელმა მაღალჩინოსანმა ეს განცხადება Real America’s Voice-ის ეთერში გააჟღერა, თუმცა კონკრეტული საფინანსო ინსტიტუტი და ქვეყანა არ დაუსახელებია.

ბესენტის განმარტებით, ვაშინგტონი ახალი შეზღუდვების ამოქმედებას ორშაბათს გეგმავს, რათა 11 სექტემბრის ტერაქტის დროს დაღუპული მოქალაქეების ხსოვნას პატივი მიაგოს. ხაზინის ხელმძღვანელმა საზოგადოებას მოუწოდა, მოვლენების განვითარებას მომავალ კვირას ყურადღებით დააკვირდეს.

აღსანიშნავია, რომ ამ გადაწყვეტილებამდე დონალდ ტრამპის ადმინისტრაციამ ეგვიპტის სიდიდით მეორე ბანკის დუბაის ფილიალები უკვე დაასანქცირა. არსებული მონაცემებით, ამ სტრუქტურამ ირანულ მხარეს $1.8 მილიარდის ოდენობის ფინანსური რესურსი გადასცა.

ამასთან, აშშ-ის ხაზინამ 4 სექტემბერს თურქეთში მოქმედი საფინანსო ინსტიტუტის, Golden Global Yatirim Bankasi Anonim Sirketi-ის და მისი შვილობილი კომპანიების წინააღმდეგ სანქციები ოფიციალურად შემოიღო. ხაზინის მდივნის განცხადებით, თურქეთის სიდიდით 30-ე ბანკი, რომელიც ირანულ სუბიექტებს თანხებს ურიცხავდა, საქმიანობას უახლოეს პერიოდში სწორედ ამერიკული შეზღუდვების დამსახურებით შეწყვეტს.

ცნობისთვის, შეერთებულმა შტატებმა ირანის წინააღმდეგ ეკონომიკური შეზღუდვების თანმიმდევრული დაწესება თებერვალში, ახლო აღმოსავლეთში კონფლიქტის გამწვავების შემდეგ დაიწყო. ოფიციალურმა ვაშინგტონმა თეირანის ეკონომიკური იზოლაციის პოლიტიკა რეგიონში ვითარების ესკალაციის პარალელურად გაააქტიურა.