აშშ-ის მთავრობა ახალი AI მოდელებისთვის რეგულაციების გამკაცრებას გეგმავს

აშშ-ის ადმინისტრაციამ ხელოვნური ინტელექტის განვითარებაზე ზედამხედველობის მიზნით, შესაძლოა, სპეციალური სამუშაო ჯგუფის შექმნის ინიციატივით გამოვიდეს. The New York Times-ის ინფორმაციით, განხილვის პროცესში არსებული ერთ-ერთი სცენარი ახალი მოდელების საჯარო სივრცეში გამოჩენამდე მათ ფედერალურ შემოწმებას ითვალისწინებს.

ამ ეტაპზე საბოლოო მიდგომა ჩამოყალიბებული არ არის, თუმცა თეთრი სახლი ბრიტანულ მოდელს განიხილავს, სადაც ზედამხედველობის რამდენიმე შრე ტექნოლოგიების უსაფრთხოების სტანდარტებთან შესაბამისობას ადგენს, რათა ბაზარზე საშიში AI მოდელი არ გამოჩნდეს.

აღსანიშნავია, რომ მსგავსი სტრუქტურის ჩამოყალიბება ადმინისტრაციის მიდგომის მკვეთრ ცვლილებას ნიშნავს. აქამდე მოქმედი სამოქმედო სტრატეგია ტექნოლოგიური სექტორის მიმართ ლოიალურობით გამოირჩეოდა და კომპანიებისთვის მნიშვნელოვან დათმობებს ითვალისწინებდა.

როგორც ირკვევა, ახალი რეგულაციების მიზანი ინდუსტრიაში არსებული მზარდი სამართლებრივი დავებისა და უსაფრთხოების რისკების პრევენციაა. ამასთან, თეთრი სახლის შიგნით არსებობს მოლოდინი, რომ შესაძლოა, ინიციატივამ საბოლოო სახე ვერ მიიღოს და პროცესი შეჩერდეს.

ცნობისთვის, ხელოვნური ინტელექტის უსაფრთხოების საკითხი ბოლო პერიოდში საერთაშორისო დონეზე აქტიურად განიხილება, ბუნებრივია, პროცესს თან ახლავს შიდა პოლიტიკური აზრთა სხვადასხვაობა რეგულაციების სიმკაცრესთან დაკავშირებით.