აშშ-ის პრეზიდენტმა AI მოდელების შემოწმების შესახებ ახალ განკარგულებას მოაწერა ხელი
აშშ-ის პრეზიდენტმა, დონალდ ტრამპმა ხელი მოაწერა აღმასრულებელ განკარგულებას, რომელიც ტექნოლოგიური კომპანიების მიერ ხელოვნური ინტელექტის ახალი მოდელების საჯარო გამოშვებამდე მათ ნებაყოფლობით შემოწმებას ითვალისწინებს.
როგორც ირკვევა, ახალი სახელმძღვანელო პრინციპების მიხედვით, კომპანიებს მოდელების მთავრობისთვის გაზიარება პროდუქტის ბაზარზე ჩაშვებამდე 30 დღით ადრე მოუწევთ. თეთრი სახლის განცხადებით, ეს ნაბიჯი კიბერუსაფრთხოებისა და ეროვნული უსაფრთხოების გაძლიერებას ისახავს მიზნად.
საყურადღებოა, რომ დოკუმენტი არ ითვალისწინებს სავალდებულო მოთხოვნებს, რაც ანალიტიკოსების შეფასებით, ტრამპის ადმინისტრაციის მხრიდან პოზიციებს შერბილებაზე მიუთითებს.
არსებული ინფორმაციით, განკარგულების პირვანდელი ვერსია უფრო მკაცრ რეგულაციებს მოიცავდა და მოდელების 90 დღით ადრე წარდგენას მოითხოვდა. თუმცა, დოკუმენტის საბოლოო ტექსტის შეცვლაზე გავლენა სილიკონის ველის ლიდერებმა, მათ შორის ილონ მასკმა და მარკ ცუკერბერგმა იქონიეს.
პრეზიდენტის განცხადებით, ამერიკა ლიდერობს ხელოვნური ინტელექტის სფეროში და მას არ სურს ისეთი რეგულაციების მიღება, რაც ქვეყნის კონკურენტუნარიანობას შეაფერხებს.
აღსანიშნავია, რომ ახალი წესების მიხედვით, დეველოპერებს თავად შეეძლებათ განსაზღვრონ, რამდენად სარისკოა მათი პროდუქტი და საჭიროებს თუ არა ის სახელმწიფო უწყებების ჩართულობას. შეგახსენებთ, უსაფრთხოების რისკებთან დაკავშირებით შტატებში კითხვები განსაკუთრებით მას შემდეგ გაჩნდა, რაც კომპანია Anthropic-მა მოწინავე კიბერშესაძლებლობების მქონე მოდელი Mythos-ი წარადგინა.
საყურადღებოა, რომ შემსუბუქებული რეგულაციების მიუხედავად, ეროვნული უსაფრთხოების სააგენტო და თავდაცვის დეპარტამენტი იმ მოდელების იდენტიფიცირებაში მაინც ჩაერთვებიან, რომლებიც განსაკუთრებულ ზედამხედველობას საჭიროებენ. თავის მხრივ, ფინანსთა დეპარტამენტი ხელოვნური ინტელექტის სისტემებში არსებული ხარვეზების აღმოჩენაზე იქნება პასუხისმგებელი.