აშშ-ის ვიცე-პრეზიდენტის თქმით, ირანთან მოლაპარაკებებში "დიდი პროგრესია"

აშშ-ის ვიცე-პრეზიდენტმა ჯეი დი ვენსმა განაცხადა, რომ თეთრ სახლსა და თეირანს შორის გამართულ მოლაპარაკებებში მხარეებმა სერიოზულ პროგრესს მიაღწიეს. თეთრ სახლში გამართულ ბრიფინგზე გამოსვლისას ვენსმა აღნიშნა, რომ ამჟამად სამხედრო კამპანიის განახლება არცერთ მხარეს არ სურს. ვიცე-პრეზიდენტის თქმით, ამერიკა ირანის მზაობას მკაფიოდ ხედავს და აქვს სურვილი, რომ დაპირისპირებულმა მხარეებმა ახალ შეთანხმებას მიაღწიონ.

მნიშვნელოვანია ითქვას, რომ მოლაპარაკებების მთავარ პირობად დონალდ ტრამპი ირანის მიერ ბირთვული იარაღის შექმნაზე უარის სამუდამოდ თქმას მიიჩნევს. ვიცე-პრეზიდენტმა ქვეყნის ლიდერის პოზიცია გაიზიარა და აღნიშნა, რომ თეირანმა ბირთვული პოტენციალის აღდგენაზე უარი საბოლოოდ უნდა თქვას. მისი განცხადებით, ირანის მიერ მასობრივი განადგურების იარაღის მოპოვება სპარსეთის ყურის რეგიონში შეიარაღების ახალ რბოლას გამოიწვევს.

ამერიკელი ლიდერი იმედოვნებს, რომ კონფლიქტის დასრულება უახლოეს პერიოდში მოხერხდება, თუმცა ხაზგასმით იმეორებს, რომ თეთრი სახლი სამხედრო დარტყმების განახლებისთვის ნებისმიერ დროს მზადაა. მისი თქმით, ეს აუცილებლად მოხდება, თუ შეთანხმების მიღწევა ვერ მოხერხდება.