აშშ-მა და ირანმა შეთანხმებას მიაღწიეს, თუმცა ტრამპის საბოლოო დასტურს ელიან - Axios

გავლენიანი ამერიკული გამოცემა Axios-ის ინფორმაციით, ამერიკელმა და ირანელმა დიპლომატებმა ცეცხლის შეწყვეტის რეჟიმის გახანგრძლივებისა და ბირთვული პროგრამის შესახებ მოლაპარაკებების დაწყების თაობაზე შეთანხმებას მიაღწიეს.

მედიის ცნობით, ქვეყნები 60-დღიანი თავდაუსხმელობის მემორანდუმის ხელმოსაწერად ემზადებიან. თუმცა Axios-ის ინფორმაციით, დოკუმენტი ძალაში მას შემდეგ შევა, რაც მას ამერიკის შეერთებული შტატების პრეზიდენტი, დონალდ ტრამპის საბოლოო დაადასტურებს. ამჟამინდელი ცნობებით, დონალდ ტრამპმა მედიატორებს საბოლოო გადაწყვეტილების მისაღებად რამდენიმე დღე სთხოვა.

როგორც ირკვევა, მხარეებმა შეთანხმების ძირითადი პირობები ჯერ კიდევ სამშაბათს შეათანხმეს. ამის შემდეგ დოკუმენტი დასამტკიცებლად უმაღლეს ხელმძღვანელობას გადაეცა. ამერიკელი მაღალჩინოსნების განცხადებით, ირანულმა მხარემ ვაშინგტონს უკვე შეატყობინა, რომ მზად არის ხელმოწერისთვის.

საყურადღებოა, რომ თავად ოფიციალურ თეირანს ეს ინფორმაცია ჯერ არ დაუდასტურებია.

რაც შეეხება დოკუმენტის კონკრეტულ პირობებს, ურთიერთგაგების მემორანდუმი ჰორმუზის სრუტეში საზღვაო მიმოსვლის სრულ, შეუზღუდავ აღდგენას ითვალისწინებს. შეთანხმების მიხედვით, ირანმა სრუტეში განთავსებული ყველა საზღვაო ნაღმი 30 დღის ვადაში უნდა გააუვნებელყოს.

პარალელურად, ამერიკული მხარე საზღვაო ბლოკადას ეტაპობრივად, სრუტეში საზღვაო გადაზიდვების აღდგენის მასშტაბების პროპორციულად მოხსნის. დოკუმენტი ასევე მოიცავს თეირანის ოფიციალურ პირობას, რომლის მიხედვითაც ქვეყანა ბირთვულ იარაღს არ შექმნის.

რაც შეეხება უკვე გამდიდრებულ ურანს, მათი ბედის გადასაწყვეტად მხარეები 60-დღიან ვადას აიღებენ. დაგეგმილი მოლაპარაკებების დროს, ვაშინგტონი, სავარაუდოდ, ირანისთვის სანქციების შემსუბუქებასა და გაყინული ფინანსების დაბრუნებაზეც იმსჯელებს.