აშშ-მა ჰორმუზის სრუტის მიმართულებით გაშვებული დრონები ჩამოაგდო და ირანში ობიექტებს დაარტყა
6 ივნისის ღამეს აშშ-მა ჰორმუზზე ირანის ახალი თავდასხმები აღკვეთა. აშშ-ის ძალებმა ჩამოაგდეს ირანის მიერ ჰორმუზის სრუტისა და ყურის რეგიონის მიმართულებით გაშვებული დრონები, რის პარალელურადაც ქუვეითსა და ბაჰრეინში განგაშის სირენები ჩაირთო.
ამასთან, ამერიკელმა სამხედროებმა დარტყმები განახორციელეს ირანის სანაპირო ობიექტებზე.
„რამდენიმე წუთის წინ, აშშ-ის ცენტრალური სარდლობის (CENTCOM) ძალებმა ჩამოაგდეს ირანული წარმოების ოთხი დრონი, რომლებიც ჰორმუზის სრუტის მიმართულებით იყო გაშვებული. თავდამსხმელი დრონები უშუალო საფრთხეს უქმნიდნენ რეგიონში საზღვაო მიმოსვლას. შემდგომი თავდასხმების თავიდან აცილების მიზნით, აშშ-ის ძალებმა, თავდაცვის ფარგლებში, საპასუხო დარტყმები განახორციელეს ირანის სანაპირო მეთვალყურეობის რადარებზე გორუკსა და კუნძულ კეშმზე.
ამერიკული ძალები ინარჩუნებენ სიფხიზლეს და მზად არიან თავდაცვის მიზნით უპასუხონ ირანის ნებისმიერ გაუმართლებელ აგრესიას",- წერს აშშ-ის ცენტრალური სარდლობა.
ირანული მედიის ცნობით, თეირანმა „გამაფრთხილებელი ღონისძიების“ სახით გახსნა ცეცხლი, რაც „შესაძლოა დაკავშირებული ყოფილიყო“ რეგიონში მყოფ აშშ-ის სამხედრო-საზღვაო ხომალდებთან.
BM.GE
წყარო: bm.ge