აშშ-მა ირანს ახალი სანქციები დაუწესა - ვის და რატომ შეეხო შეზღუდვები?

აშშ-ის ფინანსთა სამინისტრომ ირანის მიერ ნავთობით ვაჭრობის წინააღმდეგ ახალი სანქციები დააწესა. Reuters-ის ცნობით, ამერიკულმა მხარემ შავ სიაში 8 გემი და 15-ზე მეტი ისეთი კომპანია შეიყვანა, რომლებიც ირანის რევოლუციის გუშაგთა კორპუსთანაა დაკავშირებული. დასახელებული სუბიექტები გლობალურ ბაზარზე ირანული ნედლი ნავთობისა და ნავთობპროდუქტების ტრანსპორტირებაში მონაწილეობდნენ და თეირანს ომის საწარმოებლად ფულით ამარაგებდნენ.

მნიშვნელოვანია ითქვას, რომ სანქცირებულ ობიექტებს შორის ჰონკონგში რეგისტრირებული Worth Seen Energy Limited-ი, დუბაიში ბაზირებული Symphony Shipping-ი და ტანკერი Flora-ც მოხვდნენ.

ფინანსთა მინისტრ სკოტ ბესენტის განცხადებით, ვაშინგტონი ირანის მთავრობას სამხედრო პოტენციალის აღსადგენად ნავთობიდან შემოსავლების გაზრდის საშუალებას არ მისცემს. როგორც ირკვევა, ზოგიერთი დასახელებული კომპანია პროდუქციის მოსაპოვებლად ირანის შეიარაღებული ძალების ინფრასტრუქტურას აქტიურად იყენებდა. მაგალითად, Worth Seen Energy Limited-ი ნავთობპროდუქტებს Sepehr Energy Jahan-ის სახელით ყიდულობდა. ეს კომპანია კი ირანის გენერალური შტაბის სამხედრო ფრთის წარმომადგენელს ეკუთვნის.

საყურადღებოა, რომ შეზღუდვები დაწესდა იმ ფონზე, როდესაც ვაშინგტონმა და თეირანმა ცეცხლის შეწყვეტის შესახებ წინასწარ შეთანხმებას მიაღწიეს. დასახელებული შეთანხმება ჰორმუზის სრუტეში გემების მიმოსვლაზე დაწესებული შეზღუდვების გაუქმებას ითვალისწინებს.