აშშ-მა საქართველოში დაფუძნებული კრიპტოკომპანია ირანთან კავშირის გამო დაასანქცირა

აშშ-ის სახაზინო დეპარტამენტმა სანქციების სიაში შეიყვანა საქართველოში დაფუძნებული კომპანია, რომელიც ირანულ უკანონო კრიპტო-ქსელებთან არის დაკავშირებული.

კერძოდ, განცხადების თანახმად, სიავაშ ქეივანფური, რომელიც ირანში დაიბადა, დომინიკისა და ავღანეთის დამატებით მოქალაქეობას ფლობს და არაბთა გაერთიანებულ საამიროებში ცხოვრობდა, მართავს კომპანიების მრავალეროვნულ ქსელს, რომელიც ციფრულ ვალუტასთან დაკავშირებულ უკანონო საქმიანობას უწყობს ხელს. ქეივანფური, საქართველოში დაფუძნებული თავისი კომპანიის, SHPS Shelbit-ის (Shelbit) მეშვეობით, მართავს Shelbit Exchange-ს (Shelbit Exchange).

ირკვევა, რომ ირანის ისლამური რევოლუციის გუშაგთა კორპუსის (IRGC) კუთვნილ ციფრული ვალუტის მისამართებიდან Shelbit Exchange-ის ციფრული ვალუტის მისამართებზე გადარიცხულია 1 მილიონ აშშ დოლარზე მეტი ღირებულების ციფრული აქტივები. ამასთან, Shelbit Exchange-ის მისამართებიდან IRGC-ის ციფრული ვალუტის მისამართებზე ასევე გადაირიცხა 2 მილიონ აშშ დოლარზე მეტი ღირებულების აქტივები. გარდა ამისა, ქეივანფურის კუთვნილმა ან მის მიერ კონტროლირებულმა ციფრული ვალუტის მისამართებმა 2 მილიონ აშშ დოლარზე მეტი ღირებულების ციფრული აქტივები გადარიცხეს აშშ-ის მიერ სანქცირებულ Nobitex-ზე.