აშშ-ში დიზელის ფასმა ისტორიულ მაქსიმუმს მიაღწია და $6-ს გადააჭარბა

აშშ-ში დიზელის ფასმა ისტორიაში პირველად ერთ გალონზე $6-ის ნიშნულს გადააჭარბა. არსებული ინფორმაციით, საწვავის გაძვირება უკრაინასა და ირანში მიმდინარე საომარ მოქმედებებს უკავშირდება.

AAA-ის მონაცემებით, ქვეყნის მასშტაბით დიზელის საშუალო ფასმა $6.0556 შეადგინა. ცნობისთვის, ეს მაჩვენებელი გასული წლის ანალოგიურ პერიოდთან შედარებით 63%-ით ზრდას ნიშნავს. აღსანიშნი ფაქტია ისიც, რომ აშშ-ის უმსხვილეს სასოფლო-სამეურნეო შტატ კალიფორნიაში ერთ გალონ საწვავზე ფასი უკვე $7.9-ს გადასცდა.

ენერგეტიკის დარგის ექსპერტები დიზელის გაძვირებას მთლიანი ეკონომიკისთვის სერიოზულ საფრთხედ მიიჩნევენ. Rapidan Energy-ის პრეზიდენტმა, ბობ მაკნალიმ დიზელს ეკონომიკის „სასიცოცხლო ძალა“ უწოდა. ანალიტიკოსის განმარტებით, დიზელით სამომხმარებლო პროდუქციის გადამზიდი სატვირთო ავტომობილები, მატარებლები, გემები და სასოფლო-სამეურნეო ტექნიკა მარაგდება. შესაბამისად, საწვავის მაღალი ღირებულება სურსათის, სამომხმარებლო საქონლისა და ენერგორესურსების სამომხმარებლო ფასებზე პირდაპირ აისახება.

GasBuddy-ის ნავთობის ანალიზის მიმართულების ხელმძღვანელის, პატრიკ დე ჰაანის განცხადებით, მიმდინარე მაჩვენებლების შენარჩუნების შემთხვევაში, დიზელი აშშ-ის ეკონომიკის „ჩუმ მკვლელად“ იქცევა.

ცნობისთვის, საწვავის გაძვირება გლობალურ ბაზარზე ნედლეულის მიწოდების მასშტაბურ შეფერხებას უკავშირდება. აშშ-სა და ირანს შორის სამხედრო დაპირისპირების გამწვავების ფონზე, ნედლი ნავთობის ფიუჩერსულმა ფასმა ბარელზე უკვე $100-ს გადააჭარბა. მხოლოდ სექტემბერში ნედლეულის ღირებულება ჯამში 20%-ით გაიზარდა. საომარმა მოქმედებებმა ნავთობგადასამუშავებელ ინფრასტრუქტურას მნიშვნელოვანი ზიანი მიაყენა.