აშშ-ში კანადური ალკოჰოლისა და რძის პროდუქტების იმპორტის აკრძალვა ამოქმედდა

შეერთებულ შტატებსა და კანადას შორის მიმდინარე სავაჭრო ომის ფარგლებში, კანადური ალკოჰოლის, რძის პროდუქტებისა და მოტოციკლების იმპორტზე ვაშინგტონის მიერ დაწესებული შეზღუდვები ძალაში ოფიციალურად შევიდა. არსებული ინფორმაციით, ახალი რეგულაცია დაახლოებით C$1 მილიარდის ($710 მლნ) ღირებულების ალკოჰოლურ სასმელებს, ცილოვანი ფხვნილისთვის განკუთვნილ რძის შრატსა და $120 მილიონის ღირებულების 5,000 ერთეულ მოტოციკლს შეეხო.

ინფორმაციისთვის, თეთრი სახლის ლიდერმა დონალდ ტრამპმა საიმპორტო სანქციების შესახებ განკარგულებებს ხელი 8 სექტემბერს მოაწერა. მაშინ აშშ-ის პრეზიდენტმა ეს ნაბიჯი კანადის მხრიდან ამერიკული პროდუქციის მიმართ არსებული უსამართლო მიდგომითა და დისკრიმინაციული ზომებით ახსნა.

ცნობისთვის, მეზობელ სახელმწიფოებს შორის სავაჭრო მოლაპარაკებების პროცესი ამ ეტაპზე სრულად შეჩერებულია. CNBC-ის ეთერში აშშ-ის სავაჭრო წარმომადგენელმა ჯეიმისონ გრირმა განაცხადა, რომ პრეზიდენტი დონალდ ტრამპი შექმნილი ვითარებით სრულებით კმაყოფილია. როგორც გრირი აღნიშნავს, მხარეებს შორის პერიოდული სატელეფონო კომუნიკაცია მაინც შენარჩუნებულია, თუმცა ვაშინგტონი ახალი შეთანხმების სასწრაფოდ მიღწევის აუცილებლობას ვერ ხედავს.

რაც შეეხება ოფიციალურ ოტავას, ქვეყნის პრემიერ-მინისტრ მარკ კარნის განცხადებით, ახალ საიმპორტო შეზღუდვებს კანადის მთლიან ეკონომიკაზე მხოლოდ "ზომიერი" გავლენა ექნება. მთავრობის მეთაურმა აღიარა, რომ აკრძალვა კონკრეტულ მიზნობრივ სექტორებსა და ბიზნესებს გარკვეულ ზიანს მიაყენებს, თუმცა, როგორც კარნი აღნიშნავს, კანადა საპასუხო ზომების დამატებით გამკაცრებას არ გეგმავს.

მნიშვნელოვანია ითქვას, რომ ახალმა რეგულაციებმა ორივე ქვეყნის ბიზნესსექტორში სერიოზული შეშფოთება გამოიწვია. კანადური ალკოჰოლის ექსპორტის თითქმის 93% შეერთებულ შტატებზე გადიოდა. ამ მაჩვენებლის გათვალისწინებით, მწარმოებელთა ასოციაცია Spirits Canada-მ ინდუსტრიისთვის მოსალოდნელ სერიოზულ შედეგებზე ღიად დაიწყო საუბარი.