აშშ-ში რუსეთის წინააღმდეგ 100%-იანი ტარიფების კანონპროექტის მიღება შეფერხდა

აშშ-ის წარმომადგენელთა პალატაში რუსეთის წინააღმდეგ მიმართული მკაცრი სანქციების კანონპროექტის განხილვა შეფერხდა.

წარმომადგენელთა პალატის სპიკერი, მაიკ ჯონსონი დოკუმენტის კენჭისყრაზე 3 ნოემბრის შუალედურ არჩევნებამდე დაყენებას არარეალისტურად მიიჩნევს. ჯონსონის განცხადებით, უახლოესი ორი თვის განმავლობაში კონგრესმენები ვაშინგტონში მხოლოდ რამდენიმე სამუშაო დღეს გაატარებენ და კანონპროექტის დროულად მიღებას ვერ შეძლებენ.

შეგახსენებთ, საკანონმდებლო ინიციატივა მიზნად რუსული ნავთობისა და ბუნებრივი აირის ხუთი უმსხვილესი იმპორტიორი ქვეყნისთვის 100%-იანი ტარიფების დაწესებას ისახავს. Bloomberg-ის ცნობით, ეს შეზღუდვები ჩინეთს, ინდოეთსა და თურქეთს შეეხება და სანქციების გვერდის ავლაში ჩართულ სხვა სახელმწიფოებზეც გავრცელდება.

რაც შეეხება კანონპროექტის სამომავლო პერსპექტივას, ამ მომენტისთვის მისი დაჩქარებული პროცედურით მიღება, ფაქტობრივად, გამორიცხულია, რადგან მის დასამტკიცებლად სპიკერ მაიკ ჯონსონს კონგრესმენთა ორი მესამედის მხარდაჭერა დასჭირდება და ამ ბარიერის გადალახვა დემოკრატების გარეშე შეუძლებელი იქნება. საგარეო საქმეთა და საბიუჯეტო კომიტეტების წამყვანი დემოკრატები ინიციატივას რამდენიმე კვირაა ღიად ეწინააღმდეგებიან, რის გამოც ორპარტიული კონსენსუსის მიღწევა მნიშვნელოვნად ჭიანურდება.

ცნობისთვის, აშშ-ის სენატმა ეს კანონპროექტი 7 აგვისტოს 86 ხმით 11-ის წინააღმდეგ დაამტკიცა. დოკუმენტის თანაავტორი დემოკრატი სენატორი რიჩარდ ბლუმენტალი ინიციატივის საბოლოო მიღებას 2026 წლის სექტემბერში ელოდა, თუმცა შიდა პოლიტიკურმა დაძაბულობამ, გაჩენილმა წინააღმდეგობებმა და მოახლოებულმა არჩევნებმა პროცესი შეაფერხა.