აზერბაიჯანი და ყაზახეთი კასპიის ზღვაში ოპტიკურ-ბოჭკოვან კაბელს 2026 წლის ბოლომდე აამოქმედებენ
აზერბაიჯანის პრეზიდენტმა ილჰამ ალიევმა განაცხადა, რომ ყაზახეთთან დამაკავშირებელი ოპტიკურ-ბოჭკოვანი საკაბელო ხაზი 2026 წლის ბოლომდე ამოქმედდება.
სახელმწიფოს მეთაურმა ეს ინფორმაცია ბაქოში გამართულ აზერბაიჯანის მეორე საერთაშორისო საინვესტიციო ფორუმზე გააჟღერა. ილჰამ ალიევმა სიტყვით გამოსვლისას აღნიშნა, რომ კასპიის ზღვის ფსკერზე გამავალი ახალი ინფრასტრუქტურა ორ ქვეყანას ერთმანეთთან დააკავშირებს და რეგიონის სტრატეგიულ უპირატესობას გაამყარებს.
როგორც ადგილობრივი მედია წერს, აზერბაიჯანის პრეზიდენტი და ყაზახეთის ლიდერი ყასიმ-ჟომარტ ტოკაევი ორმხრივი ციფრული თანამშრომლობის გაფართოებაზე აქტიურად მუშაობენ. ეს სტრატეგიული თანამშრომლობა კი მიზნად ცენტრალურ აზიასა და სამხრეთ კავკასიას შორის ციფრული კავშირების გაძლიერებას ისახავს. პროექტი ითვალისწინებს წყალქვეშა მაგისტრალს, რომელიც რეგიონის ინტერნეტ ინფრასტრუქტურას ფუნდამენტურად გარდაქმნის. ამას გარდა, ახალი საკაბელო კავშირი რეგიონული საკომუნიკაციო ქსელების დივერსიფიკაციას შეუწყობს ხელს და ორ რეგიონს შორის მონაცემთა სწრაფ მიმოცვლას უზრუნველყოფს.
BM.GE
წყარო: bm.ge