აზერბაიჯანის გადასამუშავებელი მრეწველობა 3.4%-ით გაიზარდა

აზერბაიჯანის გადასამუშავებელ მრეწველობაში მიმდინარე წლის იანვარ-აგვისტოში წარმოებული პროდუქციისა და გაწეული მომსახურების საერთო მოცულობა გასული წლის ანალოგიურ პერიოდთან შედარებით 3.4%-ით გაიზარდა.

როგორც ირკვევა, საანგარიშო რვა თვეში სექტორის მიერ გამოშვებული პროდუქციის ჯამურმა ღირებულებამ $8.77 მლრდ. შეადგინა. ოფიციალურ მონაცემებს ქვეყნის სტატისტიკის სახელმწიფო კომიტეტზე დაყრდნობით საინფორმაციო სააგენტო Report-ი ავრცელებს. აღსანიშნავია, რომ დაფიქსირებული შედეგი სახელმწიფოს გადასამუშავებელი ინდუსტრიის სტაბილურ გაფართოებაზე მიუთითებს.

მნიშვნელოვანია ითქვას, რომ დარგობრივ ჭრილში ყველაზე მასშტაბური ზრდა სატრანსპორტო საშუალებების წარმოებამ დააფიქსირა. ავტომობილების, მისაბმელებისა და ნახევარმისაბმელების გამოშვება 89.3%-ით გაიზარდა, ფარმაცევტული პროდუქციის წარმოებამ კი 48.4%-ით მოიმატა.

ხის დამუშავებისა და ხის ნაწარმის წარმოება 38.7%-ით გაიზარდა, ტექსტილის ინდუსტრიამ კი 28.8%-იანი მატება დააფიქსირა. თამბაქოს ნაწარმის გამოშვებამ 16.3%-ით მოიმატა, ხოლო ქაღალდისა და მუყაოს წარმოება 14.1%-ით გაფართოვდა.

რეზინისა და პლასტმასის პროდუქციის მოცულობა 9.2%-ით გაიზარდა, სამშენებლო მასალების გამოშვებამ კი 9%-იანი მატება დააფიქსირა. ტყავის ნაწარმისა და ფეხსაცმლის სექტორში 8%-იანი ზრდა დაფიქსირდა, საკვები პროდუქტების გამოშვებამ კი 7.9%-ით მოიმატა. მეტალურგიული მრეწველობის მოცულობა 6.9%-ით გაიზარდა, ელექტრომოწყობილობების წარმოება კი 5.4%-ით გაფართოვდა.