ბათუმში "შავი ზღვის თაფლის ფესტივალი" გაიმართა

ბათუმში „შავი ზღვის თაფლის ფესტივალი 2026“ გაიმართა. ფესტივალის ფარგლებში, სასტუმროების, რესტორნების წარმომადგენლებსა და მეფუტკრეებს შორის B2B შეხვედრები გაიმართა.

როგორც აჭარის მთავრობა იტყობინება, ღონისძიებას აჭარის მთავრობის თავმჯდომარე ზურაბ პატარაძე, აჭარის უმაღლესი საბჭოს თავმჯდომარე ცოტნე ანანიძესთან და აჭარის სოფლის მეურნეობისა და გარემოს დაცვის მინისტრთან, დენის სალუქვაძესთან ერთად დაესწრო.

"მთავრობის თავმჯდომარემ ყურადღება გაამახვილა ფერმერების მხარდაჭერაზე, ქართული თაფლის პოპულარიზაციის მნიშვნელობაზე და აღნიშნა, რომ მთავრობის ხელშეწყობით, 2026 წელს სოფლისა და სოფლის მეურნეობის განვითარების პროგრამის ფარგლებში, მეფუტკრეობის მიმართულებით სხვადასხვა პროექტი ფინანსდება და მიმდინარეობს ფერმერების თანადაფინანსებაც. ასეთი ღონისძიებების ორგანიზება კი დამატებითი ბერკეტია მეფუტკრეების შესაძლებლობების გაზრდისა და მოტივაციის გაძლიერებისთვის.

მსგავსი ღონისძიებები ხელს უწყობს მეფუტკრეობის დარგის განვითარებას, ადგილობრივი ფერმერების მხარდაჭერასა და ქართული თაფლის ცნობადობის გაზრდას. ღონისძიებაში საქართველოს სხვადასხვა რეგიონიდან ჩამოსულმა 40-ზე მეტმა მეფუტკრემ მიიღო მონაწილეობა. სტუმრებს შესაძლებლობა ჰქონდათ გასცნობოდნენ და შეეძინათ აჭარასა და საქართველოს სხვა რეგიონებში წარმოებული მეფუტკრეობის პროდუქტები.

ფესტივალს ადგილობრივ მოსახლეობასთან ერთად, უცხოელი ტურისტებიც ესწრებოდნენ. აქტიური ტურისტული სეზონის გათვალისწინებით, ორდღიანი ფესტივალის ფარგლებში სხვადასხვა გასართობი და კულტურული აქტივობაც გაიმართება", - წერია აჭარის მთავრობის პრეს-რელიზში.

შავი ზღვის თაფლის ფესტივალი ბათუმში მეცხრედ ტარდება. ღონისძიება წელს აჭარის მეფუტკრეთა ბიზნეს-ასოციაციის ორგანიზებით, აჭარის სოფლის მეურნეობისა და გარემოს დაცვის სამინისტროსა და აჭარის სავაჭრო-სამრეწველო პალატის მხარდაჭერით გაიმართა.