შსს ნარკოდანაშაულთან უკომპრომისო ბრძოლას აქტიურად განაგრძობს - ბათუმში ნარკოდანაშაულის ბრალდებით უკრაინის მოქალაქეა დაკავებული | Rustavi2
განსაკუთრებით დიდი ოდენობით ნარკოტიკები შინაგან საქმეთა სამინისტრომ ბათუმში, ანგისის ქუჩაზე ამოიღო. კორპუსში მდებარე ერთ-ერთ ბინაში ჩხრეკა და საგამოძიებო მოქმედებები რამდენიმე საათის განმავლობაში მიმდინარეობდა. ადგილზე პოლიციის მობილიზებას ადასტურებენ ადგილობრივებიც.
ბინა სადაც სამართალდამცველებმა სარეალიზაციოდ გამზადებული 50 შეკვრა "მეთადონი" ამოიღეს, უკრაინის მოქალაქეს ჰქონდა ნაქირავები. ის პოლიციამ საცხოვრებელი კომპლექსის მიმდებარე ტერიტორიაზე აიყვანა. ახალგაზრდა მამაკაცს, ბრალი ნარკოტიკების უკანონო შეძენა-შენახვისა და რეალიზაციის ხელშეწყობის მუხლით წარედგინა. ადვოკატი ადასტურებს, რომ ნარკორეალიზაციისთვის დაკავებული უკრაინის მოქალაქეა.
სარეალიზაციოდ გამზადებულ "მეთადონთან" ერთად სამართალდამცველებმა ჩხრეკისას ნარკოტიკების დაფასოებისთვის საჭირო მასალები ამოიღეს. როგორ ხდებოდა ან იგეგმებოდა ნარკოტიკების გავრცელება? ამ კითხვას პასუხი შესაძლოა თავად ბრალდებულმა გასცეს, თუ ის გამოძიებასთან ითანამშრომლებს. შინაგან საქმეთა სამინისტროში კი ამბობენ, რომ უწყება ნარკოდანაშაულთან უკომპრომისო ბრძოლას აქტიურად განაგრძობს.
ნარკოტიკების უკანონო შეძენა-შენახვისა და რეალიზაციის ხელშეწყობაში ბრალდებული უკრაინის მოქალაქეს წინასწარი პატიმრობა უკვე შეეფარდა. დანაშაული 20 წლამდე, ან უვადო თავისუფლების აღკვეთას ითვალისწინებს.
რუსთავი 2
წყარო: rustavi2.ge