ბაზარი ორბელიანზე ახალი ჩიზქეიქების ობიექტი "ციზი ჩიზქეიქი" გაიხსნა|როგორ იქცა იდეა, სრულფასოვან ბიზნესად?

ბაზარი ორბელიანზე 2 მაისს ახალი დესერტების ობიექტი „ციზი ჩიზქეიქი“ გაიხსნა. პროექტი, რომლის იდეაც ლიზი ალიბეგაშვილს ეკუთვნის და მომხმარებელს ჩიზქეიქების მრავალფეროვან არჩევანს სთავაზობს. როგორც ის BM.GE-სთან ინტერვიუში აღნიშნავს, ახალი სივრცე წლების განმავლობაში დაგროვილ გამოცდილებასა და მომხმარებლის უკუკავშირს დაეფუძნა.

„ციზი ჩიზქეიქი“ ბაზარი ორბელიანის შუაგულში პატარა ვარდისფერ სივრცედ არის წარმოდგენილი, რომელიც, როგორც დამფუძნებელი ამბობს, ყოველდღიურ რუტინაში პატარა სიხარულის შეტანას ემსახურება.

„ციზი ჩიზქეიქი 2026 წლის 2 მაისს, ბაზარი ორბელიანის მეორე სართულზე გავხსენი. იდეა ძალიან ბუნებრივად დაიბადა - მე და ჩემს მეუღლეს უკვე გვქონდა კაფე-ბარი „სამსარა“, სადაც ჩიზქეიქი მენიუში ერთ-ერთი პროდუქტი იყო. მომხმარებელთა რეაქცია იმდენად დადებითი და გულწრფელი იყო, რომ მივხვდით - ამ პროდუქტს ცალკე, სრულფასოვანი სივრცე ეკუთვნოდა. "ციზი" ყველასთვისაა - ერთადერთი პირობა ის არის, რომ უნდა გიყვარდეს ჩიზქეიქი“, - ამბობს ის და ამატებს, რომ ობიექტს სხვადასხვა ასაკისა და ინტერესის სტუმრები უკვე აქტიურად სტუმრობენ.

მისივე თქმით, ჩიზქეიქის მიმართ ინტერესი მის პირად გამოცდილებასაც უკავშირდება. „ჩიზქეიქი ძალიან მიყვარს - პირველად აგრარული უნივერსიტეტის კულინარიის აკადემიაში გავაკეთე, შემდეგ სახლში ვაგრძელებდი და „სამსარაში“ გადავიტანე. ნელ-ნელა კი ტექნიკა და გემო იხვეწებოდა“, - აღნიშნავს ის.

ამ ეტაპზე „ციზი“ ფოკუსირებულია ბასკურ ჩიზქეიქზე, რომელიც ბრენდის მთავარ პროდუქტად არის ქცეული. ალიბეგაშვილის თქმით, მისი გამორჩეულობა რამდენიმე კომპონენტზე დგას: „ჩემს შემთხვევაში განსხვავებას სამი რამ ქმნის - მაღალი ხარისხის ინგრედიენტები, წლების განმავლობაში გამომუშავებული ტექნიკა და ერთი პირადი საიდუმლო, რომელსაც, ბუნებრივია, არ გავამჟღავნებ“.

ის განსაკუთრებით უსვამს ხაზს ინგრედიენტების ხარისხს: „კომპრომისს არ ვდებ - ეს ჩემთვის პრინციპული საკითხია. ვიყენებ პრემიუმ კლასის პროდუქტებს. მათგან ზოგიერთი იმპორტულია, რადგან ადგილობრივ ბაზარზე ყოველთვის ვერ მოიძებნება ის გემო და ტექსტურა, რასაც მე ვეძებ“.