“ბენფიკამ” და ადიდასმა ხელშეკრულება 2033 წლამდე გაახანგრძლივეს

პორტუგალიურმა საფეხბურთო კლუბმა „ბენფიკამ“ და სპორტული ტანსაცმლის მწარმოებელმა კომპანია Adidas-მა ექვსწლიანი პარტნიორობის გაგრძელებაზე შეთანხმებას მიაღწიეს. თანამშრომლობა, რომელიც პორტუგალიურ ფეხბურთში ყველაზე ხანგრძლივ სპონსორულ ურთიერთობად ითვლება, 2033 წლამდე გაგრძელდება.

გარიგების ღირებულება, შეთანხმებასთან დაახლოებული წყაროს ინფორმაციით, დაახლოებით 120 მილიონ ევროს შეადგენს, რაც მას პორტუგალიური ფეხბურთის ისტორიაში ყველაზე მსხვილ სპონსორულ შეთანხმებად აქცევს. მიუხედავად ამისა, არც „ბენფიკას“ და არც Adidas-ს ერთობლივ განცხადებაში ფინანსური პირობები ოფიციალურად არ გაუმჟღავნებიათ.

სათამაშო ფორმებით მომარაგების გარდა, ახალი შეთანხმება Adidas-ს „ბენფიკას“ საწვრთნელი და განვითარების ცენტრის სახელდების უფლებასაც ანიჭებს. ობიექტს ამიერიდან Adidas Benfica Campus ეწოდება.

Adidas „ბენფიკას“ სათამაშო ფორმებით უწყვეტად 1997/98 წლების სეზონიდან ამარაგებს. მანამდე კომპანიასა და კლუბს შორის თანამშრომლობა 1983/84-დან 1989/90 წლების სეზონამდე გრძელდებოდა.