ბიზნესებს, რომლებიც ნაღდი ანგარიშსწორებით საქმიანობენ, აღრიცხვის წიგნის სამი წლის განმავლობაში შენახვა მოუწევთ
საქართველოს ფინანსთა მინისტრის ბრძანებით, შემოსავლებისა და ხარჯების გამარტივებული აღრიცხვის წესში ცვლილებები შევიდა, რომლებიც 2026 წლის 1 აგვისტოდან ამოქმედდება.
BDO-ს საკანონმდებლო მიმოხილვის თანახმად, ახალი რეგულაციით, პირებს, რომლებიც შემოსავლებისა და ხარჯების გამარტივებულ აღრიცხვას აწარმოებენ, შესაძლებლობა ექნებათ აღრიცხვის წიგნი როგორც ქაღალდზე, ისე ელექტრონული ფორმით შეინახონ.
ცვლილებების ერთ-ერთი მნიშვნელოვანი ნაწილი აღრიცხვის წიგნის დალუქვის პროცედურის გაუქმებაა. ახალი წესით, გადასახადის გადამხდელს აღარ მოუწევს საგადასახადო ორგანოსთვის მიმართვა აღრიცხვის წიგნის დასალუქად.
ამასთან, განისაზღვრა, რომ აღრიცხვის წიგნი არანაკლებ სამი წლის განმავლობაში უნდა ინახებოდეს. დოკუმენტის მიხედვით, საქმიანობის სპეციფიკიდან გამომდინარე, პირს შეიძლება ერთზე მეტი აღრიცხვის წიგნიც ჰქონდეს.
ფინანსთა სამინისტროს განმარტებით, გამარტივებული აღრიცხვის წესები ვრცელდება იმ პირებზე, რომლებიც საქონლის ან მომსახურების რეალიზაციას ძირითადად ნაღდი ანგარიშსწორებით ახორციელებენ. აღნიშნული წესი არ ეხება იმ გადასახადის გადამხდელებს, რომლებიც ვალდებულნი არიან ან ნებაყოფლობით აწარმოებენ ბუღალტრულ აღრიცხვას დარიცხვის მეთოდით, ასევე დღგ-ის გადამხდელებს.
BM.GE
წყარო: bm.ge