ბოლო 12 თვეში Emirates-მა რეკორდული წმინდა მოგება მიიღო

არაბთა გაერთიანებული საამიროების საავიაციო გიგანტმა, Emirates-მა გასული ფისკალური წლის რეკორდული ფინანსური მაჩვენებლები წარადგინა. როგორც ირკვევა მარტის ბოლოს დასრულებული 12-თვიანი პერიოდის განმავლობაში, ავიაკომპანიის წმინდა მოგებამ $5.4 მილიარდი შეადგინა. შედარებისთვის, თუ გასული წლის ანალოგიურ პერიოდში ეს მაჩვენებელი $5.2 მილიარდი იყო, ამჯერად ზრდამ $200 მილიონი შეადგინა. მნიშვნელოვანია ითქვას, რომ Emirates Group-ის ჯამური შემოსავალი 3%-ით გაიზარდა და $41 მილიარდს მიაღწია.

აღსანიშნავია, რომ რეკორდული ფინანსური შედეგები მგზავრთა ნაკადის მცირედი კლების მიუხედავად მაინც დაფიქსირდა. როგორც ირკვევა, კომპანიამ გასულ წელს 53.2 მილიონი მგზავრი გადაიყვანა, რაც წინა წლის მაჩვენებელზე ნაკლებია. შემოსავლების ზრდა ბილეთების ფასების მატებამ და საანგარიშო პერიოდის დიდ ნაწილში არსებულმა მაღალმა მოთხოვნამ განაპირობა.

არსებული ინფორმაციით, 28 თებერვალს დაწყებულმა ირანის ომმა ავიაციის სექტორზე მნიშვნელოვანი გავლენა იქონია. რეგიონში საჰაერო სივრცის დროებითმა დახურვამ და საავიაციო საწვავის ფასების ზრდამ ოპერაციული ხარჯები გაზარდა.

შეგახსენებთ, მიმდინარე კონფლიქტი საჰაერო მიმოსვლისთვის COVID-19-ის პანდემიის შემდეგ ყველაზე მასშტაბურ კრიზისად მიიჩნევა. Reuters-ის ცნობით, გლობალური გადამზიდავები ომის შედეგად გამოწვეული შეფერხებების ფონზე მუშაობას საგანგებო რეჟიმში აგრძელებენ.