"ბოსტნეულის მარაგი ამოიწურა" - ტენდერების ჩავარდნის შემდეგ, შსს პროდუქციას გამარტივებული წესით შეისყიდის

საქართველოს შინაგან საქმეთა სამინისტრო ბოსტნეულის შესყიდვას გამარტივებული წესით გეგმავს.

უწყებაში განმარტავენ, რომ სახელმწიფო შესყიდვების სააგენტოს მიერ 2026 წლის განმავლობაში გამოცხადებული სამი კონსოლიდირებული ტენდერი არ შედგა, ხოლო 29 აპრილს გამოცხადებული ახალი ტენდერი ამ დრომდე შერჩევა/შეფასების ეტაპზეა.

შსს-ის ინფორმაციით, სახელმწიფო შესყიდვების სააგენტოს წარმომადგენლებთან კომუნიკაციის შედეგად გაირკვა, რომ მიმდინარე ტენდერის დასრულებასა და გამარჯვებულ კომპანიასთან ხელშეკრულების გაფორმებას სულ მცირე 10 სამუშაო დღე დასჭირდება. ამის გამო, იმ უწყებებს, რომლებსაც ბოსტნეული გადაუდებლად სჭირდებათ, შესყიდვების დამოუკიდებლად განხორციელება ურჩიეს.

ეკონომიკური დეპარტამენტის მიერ ჩატარებული ბაზრის კვლევის ფარგლებში შეთავაზება ორმა კომპანიამ წარადგინა. ერთ-ერთი პრეტენდენტის შეთავაზების ღირებულება 74 321 ლარია, მეორის კი 72 284 ლარი. სამინისტრო სწორედ დაბალი ფასის მქონე წინადადების ფარგლებში გეგმავს შესყიდვას.

დოკუმენტში ასევე აღნიშნულია, რომ მიმდინარე წლის 2 აპრილს, შსს-მ შპს „GFCOMPANY ჯიეფკომპანისთან“ 77 081 ლარის ხელშეკრულება გააფორმა, თუმცა ამ ხელშეკრულებით გათვალისწინებული ბოსტნეულის მარაგი უკვე სრულად ამოწურულია.

შსს-ის ეკონომიკური დეპარტამენტი ითხოვს თანხმობას, რომ ბოსტნეულის სახელმწიფო შესყიდვა არაუმეტეს 72 284 ლარის ფარგლებში გამარტივებული შესყიდვის საშუალებით განხორციელდეს. აქედან 66 969 ლარი სახელმწიფო ბიუჯეტიდან დაფინანსდება, ხოლო 5 315 ლარი — BP-სთან გაფორმებული საერთაშორისო ხელშეკრულების საფუძველზე მიღებული გრანტიდან.