ბრიტანეთის პრემიერი რუსულ ნავთობზე სანქციების გაუქმებას უარყოფს

დიდი ბრიტანეთის პრემიერ-მინისტრმა, კირ სტარმერმა რუსულ ნავთობზე დაწესებული სანქციების შემსუბუქება კატეგორიულად უარყო. მთავრობის მეთაურის განმარტებით, ახალი შეზღუდვების პაკეტი მოქმედ რეგულაციებზე ბევრად მკაცრია და დეტალური.

სტარმერის განცხადების მიუხედავად, მიმდინარე კვირას ძალაში შევიდა სავაჭრო ლიცენზია, რომელიც მესამე ქვეყნებში გადამუშავებული დიზელისა და საავიაციო საწვავის იმპორტს უვადოდ უშვებს. აღნიშნული გადაწყვეტილება ახლო აღმოსავლეთში მიმდინარე ომის ფონზე, საწვავის გაზრდილი ფასების დასასტაბილურებლად მიიღეს. როგორც ირკვევა, ახალი რეგულაციებით იკრძალება იმ რუსული ნავთობპროდუქტების იმპორტიც, რომლებიც მესამე ქვეყნებში მუშავდება, თუმცა ბაზრის დასაცავად ორი მოკლევადიანი გამონაკლისი ლიცენზია მაინც ამოქმედდა, რომელმაც პოლიტიკური ვნებათაღელვა გამოიწვია.

პრემიერ-მინისტრის თქმით, სანქციების ეტაპობრივი დაწესება და შემსუბუქება სტანდარტული საერთაშორისო პრაქტიკაა, რომელსაც ევროკავშირი, კანადა და ავსტრალიაც აქტიურად იყენებენ.

საგულისხმოა, რომ აღნიშნულმა გადაწყვეტილებამ ბრიტანულ პოლიტიკურ სპექტრში მწვავე კრიტიკა გამოიწვია. კონსერვატიული პარტიის ლიდერმა პრემიერ-მინისტრი ქვეყნის შიდა რესურსების ათვისებაზე უარის თქმასა და რუსული ნავთობის შესყიდვაში დაადანაშაულა. ოპოზიციის ლიდერის განცხადებით, სანქციების გვერდის ავლით მიღებული თანხები უკრაინელი ჯარისკაცების წინააღმდეგ ომის დაფინანსებას ხმარდება.

კრიტიკას პარლამენტის საგარეო საქმეთა კომიტეტის ლეიბორისტი თავმჯდომარე ემილი თორნბერიც შეუერთდა. მისი განმარტებით, ლონდონის ქმედებები უკრაინელი მოკავშირეებისთვის გაუგებარია, რადგან დაპირებული შეზღუდვების ნაცვლად, სანქციებში არსებული ხარვეზები კიდევ უფრო გაღრმავდა.

არსებული ინფორმაციით, შექმნილი ვითარების გამო დიდი ბრიტანეთის ვაჭრობის მინისტრმა კრის ბრაიანტმა პარლამენტარებს ბოდიში მოუხადა. მინისტრმა პროცესის მართვას მოუხერხებელი უწოდა და მომხდარი უწყებებს შორის კავშირის ნაკლებობით ახსნა. ბრაიანტის განცხადებით, ლიცენზიები მაქსიმალურად დროებითი ხასიათის იქნება, მიღებული გადაწყვეტილება კი სანქციების რეჟიმის შესუსტებას არ ისახავს მიზნად.