ჩინეთი AI-ის შენელების ამერიკულ ინიციატივას ცივი ომის ტაქტიკად მიიჩნევს

ჩინეთის ხელისუფლებამ და სახელმწიფო მედიამ მკვეთრად გააკრიტიკეს Anthropic-ის გენერალური დირექტორის, დარიო ამოდეის ინიციატივა AI მოდელების განვითარების ტემპის შენელების შესახებ.

ოფიციალური პეკინის შეფასებით, უსაფრთხოების რისკებზე აპელირება რეალურად ვაშინგტონის ტექნოლოგიური ჰეგემონიის შენარჩუნებასა და ჩინეთის შეკავებას ისახავს მიზნად. პეკინის შეფასებით, ამოდეის მიერ წარდგენილი გეგმა ცივი ომის სტრატეგიის ნაწილია, რომლის გამოყენების საშუალებასაც ჩინეთი ამერიკულ მხარეს არ მისცემს.

როგორც ირკვევა, ამოდეიმ საკუთარ ესეში აშშ-ის ხელისუფლებას მოუწოდა, გაამკაცროს ნახევარგამტარების ექსპორტის კონტროლი ჩინეთზე და აღკვეთოს ჩინური AI ლაბორატორიების მიერ ამერიკული მოდელების არასანქცირებული კოპირება. Anthropic-ის ხელმძღვანელმა ტელეკომპანია CBS News-თან ინტერვიუში განაცხადა, რომ გლობალური ინიციატივის განხორციელებისას მთავარ გამოწვევას სწორედ ის წარმოადგენს, რომ ჩინეთი პროცესის შენელებაზე უარს იტყვის და პროგრესს მაინც აგრესიული ტემპით გააგრძელებს.

ჩინეთის საგარეო საქმეთა სამინისტროს ოფიციალურმა წარმომადგენელმა, გუო ჯიაკუნმა პრესკონფერენციაზე განაცხადა, რომ საფრთხეების პროპაგანდისტული ტირაჟირება და მტრული კონკურენცია გლობალურ AI რეგულაციებს აფერხებს. მისი თქმით, მხარეებმა მხარი უნდა დაუჭირონ ხელოვნური ინტელექტის ღია და ინკლუზიურ განვითარებას. შესაბამისად, ყველა ამერიკულ ინიციატივას, რომელიც ჩინეთს პროგრესის შენელებისკენ უბიძგებს, პეკინი აუცილებლად დაუპირისპირდება.

აღსანიშნავია, რომ პრეზიდენტმა ტრამპმა პროგრესის შეფერხების ინიციატივას მხარი არ დაუჭირა და განაცხადა, რომ ნებისმიერი სახის პაუზა Anthropic-ის თუ OpenAI-ის მხრიდან მხოლოდ იმას გამოიწვევს, რომ ტექნოლოგიური ბრძოლაში ჩინეთი ამერიკას გადაასწრებს.

შეგახსენებთ, დარიო ამოდეის ინიციატივას, რომელიც დამოუკიდებელი დამკვირვებლების ჩართულობასა და AI-სექტორის რეგულირებას ითვალისწინებს, მხარი OpenAI-ს ხელმძღვანელმა სემ ოლტმენმა და xAI-ს დამფუძნებელმა, ილონ მასკმაც დაუჭირეს.