"ჩინეთი მზადაა, ამერიკული ნავთობი შეისყიდოს" - ტრამპი

აშშ-ის პრეზიდენტის, დონალდ ტრამპის განცხადებით, ჩინეთი მზად არის, ამერიკისგან ნავთობის შესყიდვა დაიწყოს. მისი თქმით, პირისპირ შეხვედრისას ჩინეთის პრეზიდენტმა სი ძინპინმა მზადყოფნა გამოთქვა, ამერიკული ნედლი ნავთობის იმპორტი ოფიციალურად დაუშვას.

Fox News-ისთვის მიცემულ ინტერვიუში ტრამპმა გამოაცხადა, რომ მალე ჩინური გემები ნავთობის ტრანსპორტირებას ტეხასის, ლუიზიანისა და ალასკის შტატებიდან დაიწყებენ.

საყურადღებოა, რომ ჩინეთის ხელისუფლებას ეს ენერგეტიკული შეთანხმება ოფიციალურად ჯერ არ დაუდასტურებია.

ცნობისთვის, ამერიკული ნავთობის შესყიდვის საკითხი განსახილველ თემებს შორის მაშინ დადგა, რაც სი ძინპინმა და დონალდ ტრამპმა ირანის ომსა და ჰორმუზის სრუტეზე დაწესებულ ბლოკადაზე ისაუბრეს. მხარეები შეთანხმდნენ, რომ საჭიროა ქმედითი ნაბიჯების გადადგმა იმ ეკონომიკური წნეხის შესამსუბუქებლად, რაც ნაოსნობის შეფერხებას მოაქვს.

საყურადღებოა, რომ ტრამპის განცხადების მიუხედავად ნავთობის ფასები არ შემცირებულა. ბოლო 24 საათში ბრენტის მარკის წიაღისეული საწვავის ღირებულება ენერგეტიკულ ბირჟაზე თითქმის $4 დოლარით გაიზარდა და ამჟამად, საშუალოდ, $109.5 დოლარად ივაჭრება. ამერიკული WTI-ს ფასი კი ბარელზე $105 დოლარს აღწევს.