ჩინეთიდან მგზავრთნაკადი 40%-ით გაიზარდა - მინისტრის მოადგილე

2026 წლის პირველ კვარტალში ჩინეთიდან საქართველოში მგზავრთნაკადის მკვეთრი, 40%-იანი ზრდა დაფიქსირდა - ამის შესახებ ეკონომიკისა და მდგრადი განვითარების სამინისტროს მიერ გავრცელებულ, მოადგილის თამარ იოსელიანის კომენტარში წერია.

მისი თქმით, 2026 წლის პირველ კვარტალში დაფიქსირებული წარმატებული შედეგების შემდეგ, ქვეყანა ზრდის ტენდენციის შენარჩუნებას გეგმავს. მისივე თქმით, ავიაკომპანია China Eastern-თან მოლაპარაკებების ბოლო რაუნდი წარმატებით დასრულდა და საქართველოს ბაზარზე ახალი მიმართულება - შანხაი ემატება.

„China Eastern-ი წარმოადგენს ახალ ავიაკომპანიას, რომელიც შემოდის საქართველოს ბაზარზე. აღნიშნულ ავიაკომპანიასთან დამატებითი მიმართულებებზე ვმუშაობთ. 2026 წლის პირველი კვარტალში ჩინეთთან მგზავრთნაკადი წარმატებული იყო და ზრდამ დაახლოებით 40%-ი შეადგინა. დარწმუნებული ვარ, რომ ზრდის ტენდენციას შევინარჩუნებთ“, - აცხადებს მინისტრის მოადგილე.

უწყების განმარტებით, შანხაი-თბილისი-შანხაის მიმართულებით რეგულარული ფრენები 15 ივლისიდან დაიწყება და კვირაში სამი სიხშირით შესრულდება. სამინისტროში მიიჩნევენ, რომ შანხაისთან პირდაპირი კავშირი ქვეყნისთვის სტრატეგიული გარღვევაა.

თამარ იოსელიანი ხაზს უსვამს შანხაის, როგორც გლობალური ფინანსური ცენტრის მნიშვნელობას.

„შანხაი ჩვენთვის სტრატეგიულად მნიშვნელოვანი მიმართულებაა იქიდან გამომდინარე, რომ ჩინეთის ეკონომიკურ და ფინანსურ ცენტრს წარმოადგენს. შესაბამისად, მასთან დაკავშირება მოგვცემს დამატებით შესაძლებლობას, რომ ორ ქვეყანას შორის გამყარდეს როგორც ბიზნესის ურთიერთობები, ასევე მოვიზიდოთ დამატებითი ტურისტული ნაკადები“.

მინისტრის მოადგილის განცხადებით, China Eastern-თან მუშაობა უკვე გრძელდება სხვა ახალი მიმართულებების დამატებაზეც, რაც ჩინეთიდან ტურისტული და ბიზნეს ნაკადების კიდევ უფრო მეტ ზრდას შეუწყობს ხელს.