ჩინეთმა ტაივანის აღმოსავლეთით სპეციალური საზღვაო ოპერაცია დაიწყო
ჩინეთის თავდაცვის სამინისტრომ ტაივანის აღმოსავლეთით მდებარე აკვატორიაში სპეციალური საზღვაო ოპერაცია დაიწყო.
Xinhua-ს ინფორმაციით, ჩინეთის ეს ნაბიჯი იაპონიისა და ფილიპინების მიერ ცალმხრივად გამოცხადებულ „საზღვაო დელიმიტაციის შესახებ მოლაპარაკებებს“ უკავშირდება. ოფიციალური პეკინის განცხადებით, დასახელებული მოლაპარაკებები ჩინეთის ტერიტორიულ სუვერენიტეტსა და საზღვაო უფლებებს უხეშად არღვევს.
როგორც ირკვევა, ფილიპინების პრეზიდენტის იაპონიაში ბოლო ვიზიტის დროს მხარეებმა ერთობლივი განცხადება გაავრცელეს, რომელიც ტაივანის აღმოსავლეთით ექსკლუზიური ეკონომიკური ზონისა და კონტინენტური შელფის დელიმიტაციის შესახებ მოლაპარაკებების დაწყებას ითვალისწინებს. ჩინეთის საგარეო საქმეთა სამინისტროს სპიკერმა, მაო ნინგმა განმარტა, რომ ჩინეთის გვერდის ავლით დაწყებული ნებისმიერი მოლაპარაკება გაეროს საზღვაო სამართლის კონვენციას ეწინააღმდეგება და ის მიუღებელი იქნება.
საგარეო უწყების წარმომადგენლის განცხადებით, კონვენციის თანახმად, მიმდებარე ან სანაპიროების მქონე სახელმწიფოებს შორის საზღვაო ზონების დადგენა მხოლოდ ორმხრივი შეთანხმებით უნდა განხორციელდეს, ტაივანის აღმოსავლეთ წყლებთან დაკავშირებულ ნებისმიერ პროცესში კი ჩინეთი აუცილებელ მხარეს წარმოადგენს.
BM.GE
წყარო: bm.ge