ჩინეთში სამომხმარებლო და მწარმოებელთა ინფლაცია გაზარდა

აგვისტოში ჩინეთის მასშტაბით მწარმოებელთა და სამომხმარებლო ფასების ზრდის ტემპი დაჩქარდა, რაც ძირითადად ახლო აღმოსავლეთში მიმდინარე ომით გამოწვეულმა ენერგომატარებლების გაძვირებამ განაპირობა. სტატისტიკის ბიუროს მონაცემებით, სამომხმარებლო ფასების ინდექსი გასული წლის ანალოგიურ პერიოდთან შედარებით 0.8%-ით გაიზარდა, ხოლო მწარმოებელთა ფასების ინდექსმა (PPI) 3.8%-იანი ზრდა დააფიქსირა.

უწყების განცხადებით, საერთაშორისო ბაზრებზე ნედლი ნავთობისა და ფერადი ლითონების გაძვირებამ ჩინეთის საწარმოო სექტორში ხარჯების მკვეთრი ზრდა გამოიწვია. ფერადი ლითონების მოპოვებისა და გადამუშავების სექტორში პროდუქცია 20.8%-ით გაძვირდა, ხოლო ნავთობისა და გაზის მოპოვების დარგში 10.5%-იანი ზრდა დაფიქსირდა.

დაჩქარებული ინფლაციის საპასუხოდ, ჩინეთის სახალხო ბანკმა მოკლევადიანი საპროცენტო განაკვეთი 3%-მდე გაზარდა.

ამასთან, არსებული გამოწვევების საპასუხოდ, ჩინეთის ხელისუფლებამ საცხოვრებელი უძრავი ქონების წინასწარი გაყიდვები შეზღუდა და იპოთეკური სესხების მაქსიმალური ვადა 40 წლამდე გაზარდა.

ცნობისთვის, ჩინეთის მთავრობამ 2026 წლის ეკონომიკური ზრდის მიზნობრივი მაჩვენებელი 4.5%-დან 5%-მდე დიაპაზონში განსაზღვრა, თუმცა ანალიტიკოსები ეჭვობენ, რომ ამ შედეგის მიღწევა მხოლოდ აგრესიული სუბსიდირებით და სამთავრობო პროგრამებით იქნება შესაძლებელი და ის მხოლოდ ფორმალურ გამარჯვებად შეიძლება ჩაითვალოს.