ჩინეთში ტრამპის დელეგაციას ჯენსენ ჰუანგიც უერთდება

ჩინეთში პრეზიდენტ დონალდ ტრამპის დელეგაციას ამერიკული ტექნოლოგიური გიგანტის, Nvidia-ს ხელმძღვანელი ჯენსენ ჰუანგიც შეუერთდა. არსებული ინფორმაციით, ჰუანგი თავდაპირველ სიაში არ ფიგურირებდა, თუმცა მას შემდეგ, რაც მედიაში მისი არყოფნის შესახებ ინფორმაცია გავრცელდა, პრეზიდენტმა აღმასრულებელ დირექტორს პირადად დაურეკა და ვიზიტში მონაწილეობა შესთავაზა.

როგორც ირკვევა, ჯენსენ ჰუანგი საპრეზიდენტო თვითმფრინავში, Air Force One-ში, ალასკაზე ავიდა. Nvidia-ს წარმომადგენლის განცხადებით, ჰუანგი სამიტს პრეზიდენტის მიწვევით ესწრება, რათა მხარი დაუჭიროს ადმინისტრაციის მიზნებს. მნიშვნელოვანია ითქვას, რომ ტრამპი პეკინში ათზე მეტ ამერიკელ ბიზნესლიდერთან ერთად ჩავიდა, სადაც ხუთშაბათსა და პარასკევს ჩინეთის პრეზიდენტ სი ძინპინთან ოფიციალური შეხვედრებია დაგეგმილი.

ამასთან, დონალდ ტრამპმა სოციალურ ქსელში დაადასტურა ჰუანგის მონაწილეობა და აღნიშნა, რომ ჩინეთის ლიდერთან შეხვედრისას მისი მთავარი მოთხოვნა ბაზრის ამერიკული ბიზნესისთვის გახსნა იქნება. პრეზიდენტის თქმით, ეს შესაძლებლობას მისცემს "ბრწყინვალე ადამიანებს", თავიანთი შესაძლებლობებით ჩინეთის განვითარებას შეუწყონ ხელი.

აღსანიშნავია, რომ Nvidia-ს უახლესი ჩიპები, რომლებიც ხელოვნური ინტელექტის მოდელების მოსამზადებლად გამოიყენება, ბოლო ოთხი წლის განმავლობაში აშშ-ის მიერ დაწესებული მკაცრი საექსპორტო შეზღუდვების ქვეშ იმყოფება. კომპანიის ინფორმაციით, ჩინურ ბაზარზე მთავრობის მიერ დამტკიცებული ვერსიების დაშვებაც კი ამ დრომდე შეფერხებულია.

საყურადღებოა, რომ აშშ-ის ყოფილი ვაჭრობის მდივნის, კარლოს გუტიერესის შეფასებით, საექსპორტო კონტროლთან დაკავშირებით შეთანხმების მიღწევა ჯერ კიდევ შორსაა. თუმცა, მისივე თქმით, ჰუანგის ყოფნა პრეზიდენტის დელეგაციაში პოზიტიური სიგნალია როგორც კომპანიისთვის, ისე ადმინისტრაციისთვის.