ჩვენ და აზერბაიჯანი გადაბმულები ვართ - ლიანა ჯერვალიძე ენერგეტიკულ თანამშრომლობაზე
ბაქო-სუფსის მილსადენის დატვირთვა იმაზე მიუთითებს, რომ ყაზახეთიდან დამატებითი რესურსების გადმოტვირთვის შესაძლებლობა გაჩნდა - ამის შესახებ BMG-სთან რეგიონული ენერგეტიკისა და ტრანსპორტის საკითხებში ექსპერტი ლიანა ჯერვალიძე აცხადებს.
მისი თქმით, ყაზახეთიდან ნავთობის გადმოტვირთვის საკითხის გადაწყვეტა მნიშვნელოვანია, რადგან აქამდე, მის ტრანსპორტირებაში ბევრი პრობლემა იყო - მათ შორის კასპიის ჩრდილოეთ ნაწილში, სადაც ტანკერებით გადმოზიდვა გართულებული იყო და ა.შ.
„მართალია, ეს ჩვენ არ გაგვამდიდრებს - არ გვაქვს ძალიან მაღალი სატრანსპორტო ტარიფები, მაგრამ ეს მნიშვნელოვანია ქვეყნის გეოპოლიტიკური პოზიციონირებისთვის - იმისთვის, რომ ჩვენ უსაფრთხო სატრანზიტო ქვეყანა ვიყოთ.
უნდა იფიქრო, რომ თუ რესურსების გადადინება ხდება, შენ საინტერესო ხარ და თუ აღარ - ე.ი. შენი სატრანზიტო პოზიციონირება საფრთხის ქვეშაა. ამიტომ, მე ძალიან მაწუხებდა, რომ ბაქო-სუფსა არ იყო დატვირთული და არც მესმოდა იმ საფრთხის არსი, რის გამოც ნავთობსადენი გაჩერებული იყო.
როგორც კი რუსეთ-უკრაინის ომი დაიწყო, კონსორციუმმა მაშინვე საფრთხედ ჩათვალა ეს ომი და ამ მილსადენით ნავთობის ტრანსპორტირება შეწყვიტა. მაშინ, როდესაც თურქეთსა და რუსეთს შორის უწყვეტად მიდიოდა გაზი, რატომ უნდა შეშლოდა ხელი მაინცდამაინც ბაქო-სუფსის, ეს ჩემთვის გამოცანა იყო.
ამიტომ, ძალიან მიკვირდა, რომ ბაქო-სუფსა ამდენ ხანს გაჩერებული იყო - ამ ვითარებაში, როდესაც ნავთობზე ასეთი ამბავია. ახლა, როგორც იქნა, ეს საკითხი გადაწყდა“ - აცხადებს BMG-სთან ლიანა ჯერვალიძე.
მისივე თქმით, მნიშვნელოვანია დამატებითი გაზის საკითხებზე მიღწეული შეთანხმებაც.
„დარწმუნებული ვიყავი, რომ კარგი კონტრაქტის მიღების შესაძლებლობა გვექნებოდა, გამომდინარე იმ გეოპოლიტიკური ვითარებიდან, რაც ახლა არის და იმ ურთიერთობებიდან, რაც ჩვენ აზერბაიჯანთან გვაკავშირებს.