Commerzbank-მა UniCredit-ის შესყიდვის შეთავაზება ოფიციალურად უარყო

საფინანსო ინდუსტრიის გერმანულმა გიგანტმა, Commerzbank-მა იტალიური ბანკის, UniCredit-ის მიერ წარდგენილი შესყიდვის წინადადება ოფიციალურად უარყო.

არსებული ინფორმაციით, გერმანულმა ფინანსურმა ინსტიტუტმა საკუთარ აქციონერებს შეთავაზების უარყოფისკენ ოფიციალურად მოუწოდა. ხელმძღვანელობის შეფასებით, წარდგენილი პირობები კომპანიის რეალურ საბაზრო ღირებულებას არ ასახავს.

Commerzbank-ის აღმასრულებელი დირექტორი ბეტინა ორლოპი ამ წინადადებაზე დათანხმებას დამაზიანებლად მიიჩნევს. მისი შეფასებით, UniCredit-თან გაერთიანებას ბანკის მოგებიან ბიზნესმოდელზე ნეგატიური გავლენა ექნება.

მნიშვნელოვანია ითქვას, რომ იტალიური UniCredit-ის მიერ წარდგენილი წინადადება გერმანული ბანკის ყიდვის სანაცვლოდ აქციონერებს დაახლოებით €39 მილიარდის ($45.37 მლრდ.) გადახდას სთავაზობდა. აღსანიშნი ფაქტია, რომ ეს მაჩვენებელი Commerzbank-ის მიმდინარე საბაზრო ღირებულებაზე დაბალია. მნიშვნელოვანია ითქვას, რომ იტალიური ფინანსური ჯგუფი ამ დროისთვის გერმანული ბანკის უმსხვილეს აქციონერად მიიჩნევა. ამჟამად ის ბანკში თითქმის 30%-იან წილს ფლობს.

რაც შეეხება იტალიურ მხარეს, UniCredit-ის წარმომადგენლებმა გერმანული ბანკის არგუმენტები მკაცრად გააკრიტიკეს. მათ ამ განცხადებებს უსაფუძვლო უწოდეს. UniCredit-ის აღმასრულებელი დირექტორი ანდრეა ორჩელი აცხადებს, რომ Commerzbank-ი საკუთარ პოტენციალს სრულად ვერ იყენებს. მისი თქმით, თანამედროვე ქაოტური გეოპოლიტიკური გამოწვევების ფონზე, ევროპულ ბაზარს ბევრად მსხვილი და ძლიერი საბანკო ინსტიტუტები სჭირდება.

საყურადღებოა, რომ შეთავაზებას გერმანიის მთავრობა და ბანკის თანამშრომლებიც ეწინააღმდეგებიან. ისინი ამ პროცესს „მტრულ“ და „იძულებით“ ქმედებად მიიჩნევენ. ანალიტიკოსების პროგნოზით, ეს დაპირისპირება ორ წამყვან ფინანსურ ინსტიტუტს შორის კონტროლის მოპოვებისთვის ბრძოლას კიდევ უფრო გააძლიერებს.

ცნობისთვის, იტალიურმა მხარემ გერმანულ ბანკში აქციების შესყიდვა 2024 წლიდან დაიწყო. მიმდინარე წლის მარტში კი UniCredit-მა საკუთარი წილი 30%-იან ნიშნულს გადააცილა. ამ ნაბიჯით კომპანიამ გერმანული კანონმდებლობით დადგენილი სავალდებულო შესყიდვის ზღვარი გადაკვეთა.