Comstock-მა SOCAR-თან $1.65-მილიარდიანი შეთანხმება გააფორმა

ამერიკულმა ბუნებრივი აირის მწარმოებელმა Comstock Resources-მა ჰეინესვილის საბადოების აქტივებისა და ინფრასტრუქტურული ბიზნესის წილების აზერბაიჯანის სახელმწიფო ნავთობკომპანია SOCAR-ისთვის $1.65 მილიარდად მიყიდვის გადაწყვეტილება მიიღო.

არსებული ინფორმაციით, კომპანია ამ ნაბიჯით მიზნად 30 ივნისის მდგომარეობით დაფიქსირებული $3.1-მილიარდიანი წმინდა ვალის დაახლოებით $1.5 მილიარდამდე შემცირებას ისახავს. როგორც ირკვევა, მხარეები საბოლოო ხელშეკრულების გაფორმებას 31 ოქტომბრამდე გეგმავენ, გარიგების დახურვას კი წლის ბოლომდე ელიან.

მნიშვნელოვანია ითქვას, რომ შეთანხმების ფარგლებში SOCAR-ი "Legacy ჰეინესვილის" აქტივების 20%-იან, ხოლო შვილობილი კომპანია Pinnacle Gas Services-ის 15%-იან წილს მიიღებს. ამას გარდა, აზერბაიჯანული კომპანია Western Haynesville-ის აქტივებში თავდაპირველად 15%-იან წილს დაეუფლება. ეს წილი ხუთი წლის გასვლისა და ინვესტიციაზე 15%-იანი უკუგების მიღების შემდეგ 7.5%-მდე შემცირდება.

ცვლილებების მიუხედავად, Comstock-ი მოპოვებითი აქტივების ოპერატორის სტატუსს შეინარჩუნებს და Pinnacle Gas Services-ის მართვასაც გააგრძელებს. აღსანიშნავია, რომ დადებული შეთანხმება SOCAR-ს სამომავლო პროექტებში ანალოგიური პროპორციით მონაწილეობის საშუალებას მისცემს, ამერიკულ მხარეს კი საერთაშორისო ბაზრებზე საკუთარი პროდუქციის გატანის გზებს გაუხსნის.

ცნობისთვის, ჰეინესვილის აუზი შეერთებული შტატების ერთ-ერთ უმსხვილეს ბუნებრივი აირის საბადოდ მიიჩნევა. რეგიონში მოპოვებული რესურსი ამერიკული თხევადი ბუნებრივი გაზის ექსპორტის გაფართოებასა და ენერგეტიკული მოთხოვნის დაკმაყოფილებაში მნიშვნელოვან როლს ასრულებს.