დეფექტის გამო, Mercedes-მა 144 000-მდე ავტომობილი უკან გაიხმო

ტექნიკური დეფექტის გამო, გერმანულმა Mercedes-Benz-მა 2024-2026 წლების 144,000-ზე მეტი მოდელი უკან გამოიხმო.

აშშ-ის საგზაო მოძრაობის უსაფრთხოების ეროვნული ადმინისტრაციის (NHTSA) დოკუმენტაციით ირკვევა, რომ ხარვეზი ციფრული ხელსაწყოების პანელს უკავშირდება. არსებული ინფორმაციით, პროგრამული პრობლემა იდენტიფიცირებული ავტომობილების 100%-ს ეხება. გაწვევა მოიცავს ისეთ მოდელებს, როგორიცაა: AMG GT, C-class, E-class, SL-class, CLE-class და GLC-class.

როგორც ირკვევა, პრობლემა საინფორმაციო-გასართობი სისტემის მართვის ბლოკის პროგრამულ უზრუნველყოფაშია. NHTSA-ის მონაცემებით, სისტემის მუშაობისას, შესაძლოა, გაიზარდოს იძულებითი გადატვირთვის სიხშირე, რაც ციფრული ეკრანის დროებით გათიშვას იწვევს. აღნიშნული ხარვეზის გამო მძღოლი კარგავს წვდომას მნიშვნელოვან ინფორმაციაზე, რაც ავარიის რისკს ზრდის. მნიშვნელოვანია ითქვას, რომ სისტემის გათიშვამდე მძღოლი წინასწარ გაფრთხილებას არ იღებს, ხოლო ხარვეზის დროს პანელი სისტემის გადატვირთვამდე ითიშება.

აღსანიშნია ისიც, რომ პრობლემის მოგვარება საკმაოდ მარტივია და ის პროგრამული უზრუნველყოფის განახლებას გულისხმობს. კომპანია ავტომობილების მფლობელებს სთხოვს, ეწვიონ Mercedes-Benz-ის ავტორიზებულ სერვისცენტრებს, სადაც ტექნიკოსები მართვის ბლოკის პროგრამას განაახლებენ.