Dell-ის კვარტალური შემოსავალი 88%-ით - კომპანიის აქციების ფასი 31%-ით გაიზარდა

ამერიკულმა ტექნოლოგიურმა გიგანტმა, Dell-მა 2026 წლის პირველი კვარტალის ფინანსური შედეგები გამოაქვეყნა. გასულ სამ თვეში კომპანიის შემოსავალი 88%-ით გაიზარდა და $43.84 მილიარდი შეადგინა, რითაც უოლ-სტრიტის პროგნოზს ($35.43 მლრდ.) მნიშვნელოვნად გადააჭარბა. აღსანიშნი ფაქტია, რომ თუ გასული წლის ანალოგიურ პერიოდში კომპანიამ $965 მილიონის წმინდა მოგება მიიღო, ამჯერად მაჩვენებელმა $3.44 მილიარდი შეადგინა. რაც შეეხება თითო აქციაზე მოგებას, ამ მაჩვენებელმა $4.86 შეადგინა და ექსპერტების ნავარაუდევ $2.94-ს მნიშვნელოვნად გადააჭარბა.

ბოლო 3 თვეში ყველაზე წარმატებული ინფრასტრუქტურული გადაწყვეტილებების დეპარტამენტი აღმოჩნდა, რომლის შემოსავალიც 181%-ით გაიზარდა და $29 მილიარდი შეადგინა. აღსანიშნია ის, რომ კონკრეტულად ხელოვნური ინტელექტის სერვერების გაყიდვებიდან მიღებული შემოსავალი გასული წლის ანალოგიურ პერიოდთან შედარებით 757%-ით გაიზარდა და მან $16.1 მილიარდს მიაღწია. პარალელურად, სამომხმარებლო პროდუქტების მიმართულების შემოსავალმა $14.6 მილიარდი შეადგინა, რაც მხოლოდ 17%-იანი ზრდაა.

როგორც ანალიტიკოსების აღნიშნავენ, კომპანიის ზრდა ხელოვნური ინტელექტის ბუმმა განაპირობა. როგორც ცნობილია, Dell-ი ძირითადად Nvidia-ს გრაფიკული პროცესორებით აღჭურვილ სერვერებს აწყობს. Nvidia-ს პროდუქციაზე კი მოთხოვნა ბოლო თვეებში მკვეთრადაა გაზრდილი. როგორც ირკვევა, ამერიკულმა ფირმამ ისარგებლა მეხსიერების ჩიპების გლობალური დეფიციტით და იანვარში პროდუქციაზე ფასები გაზარდა. სავარაუდოდ, სწორედ ამ ფაქტს უკავშირდება კონკრეტულად ამ კუთხით შემოსავლების 757%-იანი მატება.

კვარტალური შედეგების გამოქვეყნების ფონზე, კომპანიამ 2027 ფისკალური წლის საპროგნოზო მაჩვენებლებიც განაახლა და წლიური შემოსავალი $165 მილიარდიდან $169 მილიარდამდე დიაპაზონში განსაზღვრა. LSEG-ის მიერ გამოკითხული ანალიტიკოსები კი ამ პერიოდისთვის ოდნავ ნაკლებს, $142.5 მილიარდის შემოსავალს ვარაუდობდნენ. მენეჯმენტის მოლოდინით, მხოლოდ ხელოვნური ინტელექტის სერვერებიდან მიღებული წლიური შემოსავალი $60 მილიარდს მიაღწევს, რაც 144%-იან ზრდაზე მიუთითებს.