დგას თუ არა დღის წესრიგში ფოთის პორტის გაფართოება? - ირაკლი კობახიძის პასუხი

ირაკლი კობახიძე აცხადებს, რომ ყველა ინფრასტრუქტურული პროექტი, რომელიც ქვეყნის სატრანზიტო ფუნქციის განვითარებას ეხება, განვითარდება, მათ შორის ფოთის პორტი და ახალი ანაკლიის პორტი. ასე უპასუხა პრემიერ-მინისტრმა bm.ge-ს კითხვას, რომელიც ფოთის პორტის გაფართოების გაჭიანურებულ პროექტს შეეხებოდა. ირაკლი კობახიძემ კონკრეტიკისგან თავი შეიკავა.

"ზოგადად ყველა მიმართულებით, ყველა ის ინფრასტრუქტურული ობიექტი, რომელიც დაკავშირებულია ჩვენი სატრანზიტო ფუნქციის განვითარებასთან, განვითარდება. ეს ეხება როგორც ფოთის პორტს, ასევე ახალი ანაკლიის ღრმაწყლოვან პორტს. ყველა მიმართულებით გვექნება ცვლილებები, განახლება, განვითარება. ეს არის ჩვენი ერთ-ერთი უმთავრესი ამოცანა, ჩვენი ქვეყნის დაკავშირებადობის სატრანზიტო ფუნქციის განვითარება", - განაცხადა კობახიძემ.

ფოთის პორტის გაფართოების $300-მილიონიანი საინვესტიციო პროექტის საკითხი, რაზედაც ფოთის პორტის ოპერატორ კომპანია APM Terminals-სა და საქართველოს მთავრობას შორის კომუნიკაცია 2018 წლიდან მიმდინარეობს, ამ დრომდე ღიაა. APM Terminals-ის ხელმძღვანელი პირების განცხადებით, ისინი ეკონომიკისა და მდგრადი განვითარების მინისტრს მარიამ ქვრივიშვილს 2025 წლის სექტემბერში შეხვდნენ და მან საკითხისთვის 2 თვე ითხოვა. თუმცა არილის დასაწყისში „ფოთის საზღვაო ნავსადგურის“ ადმინისტრაციის ხელმძღვანელმა ზვიად ჩხარტიშვილმა BM.GE-ის განუცხადა, რომ რთულ ვითარებაში არიან, რადგან პორტი სიმძლავრეების ზღვარზე მუშაობს.

ფოთის პორტის გაფართოების პროექტთან დაკავშირებით ეკონომიკის სამინისტროს მხრიდან პროექტის განხილვა-ანალიზის პროცესის შესახებ BM.GE-მ ეკონომიკის სამინისტროს კითხვებით მიმართა და მათ პასუხს მიღებისთანავე შემოგთავაზებთ.