დღეს 312 მოქმედი პროექტი გვაქვს, რომლის სიმძლავრე 6000 მეგავატია - ეკონომიკის მინისტრის მოადგილე

"დღეს 312 აქტიური, მოქმედი პროექტია, რაც ფაქტობრივად 6000 მეგავატ სიმძლავრეს გულისხმობს", - ამის შესახებ ეკონომიკის მინისტრის მოადგილემ ინგა ფხალაძემ "იმედზე" განაცხადა.

მისივე თქმით, ენერგოსექტორი მხოლოდ ერთი მიმართულებით არ განვითარდება და აქცენტი დივერსიფიკაციაზე გაკეთდება.

"აქედან 1530 მეგავატი ჰიდრო, 2340 მეგავატი ქარის, ხოლო 2090 მეგავატი მზის ენერგიაა. ეს ნიშნავს, რომ საქართველო საკუთარი ენერგეტიკული პოტენციალის რეალიზაციისას მხოლოდ ერთი წყაროს განვითარებით არ შემოიფარგლება.

დიდი ჰესები ძალიან მნიშვნელოვანია სისტემის სტაბილურობისთვის. საქართველოს პოტენციალი ჰიდრორესურსების თვალსაზრისით ძალიან მაღალია. როგორც ცნობილია, დღევანდელი გენერაციის 80% სწორედ ჰიდრორესურსებზე მოდის. შესაბამისად, სისტემის სტაბილურობის უზრუნველსაყოფად აუცილებელია მისი დივერსიფიკაცია.

დივერსიფიკაცია სხვა წყაროების კერძოდ მზისა და ქარის ენერგიის განვითარებას გულისხმობს. როგორც უკვე აღვნიშნე, პროცენტულად ყველაფერი თანაბრად გვაქვს გადანაწილებული, თუმცა ჰიდრორესურსების არსებული პოტენციალი, რა თქმა უნდა, ჭარბობს, რადგან დღემდე გენერაციის ძირითადი წილი სწორედ მათზე მოდიოდა.

დიდი ჰესების წვლილი გენერაციაში მხოლოდ საინჟინრო მნიშვნელობით არ განისაზღვრება; აქ ძალიან მნიშვნელოვანია ის ფაქტორიც, რომ სისტემის სტაბილურობას ის ჰესები უზრუნველყოფენ, რომლებსაც რეზერვუარები აქვთ.

ვინაიდან ჩვენი გენერაცია სეზონურია, ხოლო ჰიდროგენერაციის 80% მოდინებაზე აშენებულ ჰესებზე მოდის, პიკურ საათებში მოხმარების დაკმაყოფილებისა და იმპორტზე დამოკიდებულების შემცირებისთვის დიდი ჰესების არსებობა კრიტიკულად მნიშვნელოვანია", - განაცხადა ფხალაძემ.