დიდი ბრიტანეთის მეფე ხელოვნური ინტელექტის ინდუსტრიის ლიდერებს შეხვდება

დიდი ბრიტანეთის მეფე ჩარლზ III-მ ხელოვნური ინტელექტის სექტორის წამყვანი ლიდერები ექსკლუზიურ შეხვედრაზე მიიწვია. არსებული ინფორმაციით, დახურული ფორუმი მიმდინარე თვეში შოტლანდიაში გაიმართება და მასში მონაწილეობას 30-მდე გავლენიანი ფიგურა მიიღებს.

გამოცემა POLITICO სამეფო კარის წარმომადგენელზე დაყრდნობით წერს, რომ მონარქი საკუთარი პოზიციის დაფიქსირებას არ გეგმავს. ბრიტანეთის მეფე მიზნად თანამედროვეობის უმთავრეს გამოწვევაზე მაღალი დონის დიალოგის წარმართვასა და აზრთა გაცვლის წახალისებას ისახავს.

როგორც ირკვევა, მიწვეულ სტუმრებს შორის Nvidia-ს ხელმძღვანელი ჯენსენ ჰუანგი, Google DeepMind-ის თანადამფუძნებელი დემის ჰასაბისი და ვატიკანის მრჩეველი პაოლო ბენანტი არიან.

რაც შეეხება ბრიტანეთის მონარქის დამოკიდებულებას ტექნოლოგიური სექტორის მიმართ, მეფე ჩარლზ III ხელოვნური ინტელექტის განვითარებისა და რეგულირების პროცესებში აქტიურად მონაწილეობს. გასულ წელს, ვაშინგტონში გამართული ოფიციალური ვიზიტის ფარგლებში, ბრიტანეთის მეფე Nvidia-ს, Apple-ის, Amazon-ისა და Google-ის ხელმძღვანელებს შეხვდა და ორ ქვეყანას შორის ტექნოლოგიური პარტნიორობის გაღრმავების აუცილებლობაზე ისაუბრა.