დილერების 60-70% გაჩერებულია, შემოდგომაზე ვაჭრობა კიდევ უფრო შემცირდება - ასოციაცია
საავტომობილო დარგში კლების ტენდენცია გრძელდება. წელს 6 თვეში მსუბუქი ავტომობილების როგორც რეექსპორტი, ასევე იმპორტი შემცირებულია. იანვარ-ივნისში რეექსპორტზე სულ $938 მლნ დოლარის ღირებულების ავტომობილები გავიდა, რაც წლიურად 22.9%-იანი კლებაა. 1.6 მლრდ დოლარამდე, 16.7%-ითაა შემცირებული ავტომობილების იმპორტიც.
როგორც ავტოიმპორტიორთა ასოციაციის ხელმძღვანელი BMG-სთან აცხადებს, აპრილიდან მთავრობის მიერ 6 წელზე ზემოთ ავტომობილებზე განბაჟების ტარიფების მკვეთრმა, თითქმის 6-ჯერ ზრდამ ბაზარზე არსებული ვითარება კიდევ უფრო მეტად დაამძიმა. ალექსი ნონიაძის თქმით, დილერების დიდმა ნაწილმა, რომლებიც სწორედ რეექსპორტზე იყვნენ ორიენტირებულები, საქმიანობა შეაჩერა.
ამასთან, ალექსი ნონიაძის თქმით, მოლოდინია, რომ მომდევნო თვეებში სექტორში ვაჭრობის მონაცემები კიდევ უფრო შემცირდება.
„დილერების 60-70% მოლოდინის რეჟიმშია. როდესაც დილერი არის მოლოდინის რეჟიმში და არ ვაჭრობს აუქციონებზე, ამ შემთხვევაში კომპანიებიც არ არიან სრულად დატვირთულები, გადამზიდავმა კომპანიებმაც საკმაოდ მნიშვნელოვანი ზარალით დაასრულეს წლის პირველი ნახევარი. შეიძლება ითქვას, რომ 50-60%-ით შემცირდა ვაჭრობა, ეს ნაწილობრივ ამ კომპანიების მოგებაზეც აისახება. დიდი კომპანიების ვაჭრობა შემცირდა დაახლოებით 14-15%-ით.
რა თქმა უნდა, ეს ამ სფეროში დასაქმებული ადამიანების შემოსავლებზე ნეგატიურად მოქმედებს, რაც ნეგატიურად აისახება ეკონომიკაზეც, ბიუჯეტის შევსებაზე და ა.შ. როდესაც დილერების დიდი ნაწილი მოლოდინის რეჟიმშია, არ ვაჭრობს და არაა აქტიური აუქციონებზე, ეს იმას ნიშნავს, რომ სექტემბერში, ოქტომბერში კიდევ უფრო შემცირდება ვაჭრობის მოცულობები ქვეყანაში“, - განაცხადა ალექსი ნონიაძემ.
ამასთან, ავტოიმპორტიორთა ასოციაციაში აცხადებენ, რომ ბოლო პერიოდში შეიმჩნევა ტენდენცია, რომ ბანკები დილერების დაკრედიტებისგან თავს იკავებენ.
„ასევე დილერების გარკვეული რაოდენობა გვეუბნება, რომ ბანკები კრედიტთან დაკავშირებით უარყოფით გადაწყვეტილებას იღებენ, უარს ეუბნებიან სესხის გაცემაზე. ეს შეიძლება იყოს რამდენიმე ადამიანის ცუდი ისტორიაა და დაკავშირებული იყოს დილერების გადახდისუნარიანობასთან. მაგრამ თუ ამას უფრო ფართო მასშტაბი მიეცა, ეს კიდევ ერთხელ ადასტურებს იმას, რომ ამან ფართო მასშტაბი მიიღო, ასეთ შემთხვევაში უკვე საკმაოდ ნეგატიურ მდგომარეობაში ჩავარდება დარგი.