დონალდ ტრამპმა რუსეთთან მასშტაბური შეთანხმება დააანონსა
აშშ-ის პრეზიდენტმა დონალდ ტრამპმა თეთრ სახლში ვლადიმირ პუტინის წარმომადგენელ კირილ დმიტრიევთან შეხვედრა გამართა. ოვალურ კაბინეტში ჟურნალისტებთან საუბრისას მან განაცხადა, რომ მხარეებს შორის მზადდება მასშტაბური შეთანხმება, რომელიც შესაძლოა მთელ ევროპას შეეხოს.
ამერიკის პრეზიდენტმა ხაზგასმით აღნიშნა, რომ თეთრ სახლში მყოფ უკრაინელ ოფიციალურ პირებს არ შეხვედრია და მიმდინარე მოლაპარაკებების შესახებ მათთვის არაფერი გაუზიარებია.
ინფორმაციისთვის, ეს დიპლომატიური შეხვედრა აშშ-ის პირველი ლედის, მელანია ტრამპის ინიციატივით ორგანიზებული ღონისძიების პარალელურად გაიმართა. მელანია ტრამპმა თეთრ სახლში რუს და უკრაინელ წარმომადგენლებს უმასპინძლა, რათა ქალაქ ოლეშკიში მიღწეული ჰუმანიტარული ზავი აღენიშნა.
ღონისძიებას უკრაინის უმაღლესი რადას ფრაქცია "ხალხის მსახურის" ლიდერი დავით არახამია და ადამიანის უფლებათა ომბუდსმენი დმიტრო ლუბინეციც ესწრებოდნენ.
დავით არახამიამ მელანია ტრამპის საქმიანობა დადებითად შეაფასა და დეესკალაციის პროცესის გაგრძელების სურვილი გამოთქვა.
თავის მხრივ, კირილ დმიტრიევმა პირველ ლედის ჰუმანიტარული ძალისხმევისთვის მადლობა გადაუხადა და განმარტა, რომ სამშვიდობო პროცესთან დაკავშირებით ვლადიმირ პუტინმა პირადი განკარგულება გასცა.
ცნობისთვის, მელანია ტრამპის შუამავლობით ქალაქ ოლეშკიში მიღწეული ექვსდღიანი ლოკალური ზავი 27 ოქტომბრიდან 1 ნოემბრამდე მოქმედებდა. ამ შეთანხმებამ კონფლიქტის ზონაში საომარი მოქმედებები დროებით შეაჩერა და მშვიდობიანი მოსახლეობის ევაკუაცია უზრუნველყო.
BM.GE
წყარო: bm.ge