დონალდ ტრამპმა "სუპერინტელექტის გაერთიანებული ძალები შექმნა" - რა არის ის და ვინ არიან მისი წევრები?

აშშ-ის პრეზიდენტმა დონალდ ტრამპმა ხელოვნური ინტელექტის მიმართულებით ფედერალური მთავრობის საქმიანობის კოორდინაციისთვის სპეციალური სამუშაო ჯგუფი, "სუპერინტელექტის გაერთიანებული ძალები" შექმნა.

როგორც ირკვევა, ახალ სამთავრობო ორგანოს ეროვნული დაზვერვის დირექტორი ჯეი კლეიტონი, ვაჭრობის ფედერალური კომისიის თავმჯდომარე ენდრიუ ფერგიუსონი, პენტაგონის მთავარი ტექნოლოგიური ოფიცერი ემილ მაიკლი და საკადრო მართვის სამსახურის დირექტორი სკოტ კუპორი უხელმძღვანელებენ. Truth Social-ზე გამოქვეყნებული განცხადების თანახმად, ჯგუფი ანგარიშვალდებული უშუალოდ პრეზიდენტისა და თეთრი სახლის აპარატის ხელმძღვანელის, სიუზი უაილსის წინაშე იქნება.

აღსანიშნავია, რომ ახალი სამუშაო ჯგუფი მიზნად ტექნოლოგიურ კომპანიებთან, კრიტიკული ინფრასტრუქტურის პროვაიდერებსა და მომხმარებლებთან თანამშრომლობის კოორდინაციას ისახავს. ამ კომისიას ხელოვნური ინტელექტის შესაძლებლობებისა და პოტენციური საფრთხეების შესახებ ანგარიშის მოსამზადებლად 120-დღიანი ვადა ექნება. ჯგუფმა არსებული კანონმდებლობა უნდა შეაფასოს და კონგრესის მხრიდან დამატებითი რეგულაციების მიღების საჭიროება დაადგინოს. ამას გარდა, კომისიის წევრები კიბერშეტევების, მონაცემთა დარღვევისა და უსაფრთხოების ბარიერების გვერდის ავლის შემთხვევებზე ფედერალური სააგენტოების რეაგირების მექანიზმებსაც შეისწავლიან.

რაც შეეხება რეგულირების პოლიტიკას, როგორც ირკვევა, დონალდ ტრამპის ადმინისტრაცია უპირატესობას ნებაყოფლობით მიდგომას ანიჭებს. როგორც მედია წერს, თეთრი სახლი მიზანმიმართულად გაურბის იმ ნაბიჯებს, რომლებმაც შესაძლოა ტექნოლოგიურ განვითარებასა და კონკურენციას ხელი შეუშალოს. შესაბამისად, რისკების მართვის ძირითად მექანიზმად კვლავ კერძო სექტორი დარჩება.

ცნობისთვის, ახალი სამუშაო ჯგუფის შექმნამდე თეთრ სახლში ხელოვნური ინტელექტის სფეროს ლიდერებთან შეხვედრა გაიმართა. დისკუსიაში OpenAI-ის პრეზიდენტი გრეგ ბროკმანი, Anthropic-ის აღმასრულებელი დირექტორი დარიო ამოდეი და Nvidia-ს ხელმძღვანელი ჯენსენ ჰუანგი მონაწილეობდნენ. მხარეები მოდელების განვითარების ზედამხედველობაზე, გარე შეფასებებსა და უსაფრთხოების ზომების დირექტორთა საბჭოსთვის წარდგენაზე შეთანხმდნენ.