ECB მოდელ Mythos-ისგან მომდინარე კიბერსაფრთხეების საწინააღმდეგო მექანიზმებს სწავლობს

ევროპის ცენტრალური ბანკის პრეზიდენტი, კრისტინ ლაგარდი აცხადებს, რომ უწყება ხელოვნური ინტელექტის მოდელ Mythos-ისგან მომდინარე საფრთხეებს სწავლობს. როგორც ირკვევა, ევროპული მხარისთვის მთავარი გამოწვევა აღნიშნულ ტექნოლოგიაზე წვდომის არქონაა, რაც ევროზონის ფინანსურ სისტემას აშშ-სთან შედარებით არახელსაყრელ მდგომარეობაში აყენებს.

კომპანია Anthropic-ის მიერ შემუშავებული მოდელი მიზნად კომპიუტერულ კოდში ხარვეზების აღმოჩენასა და უსაფრთხოების გაძლიერებას ისახავს. მიუხედავად ამისა, კიბერუსაფრთხოების სპეციალისტების შეფასებით, ის საბანკო სისტემებზე იერიშების გასაძლიერებლადაც შეიძლება იქნეს გამოყენებული. აღსანიშნავია, რომ ამერიკულმა სტარტაპმა Anthropic-მა Mythos-ზე წვდომა, ბოროტად გამოყენების შესაძლო რისკების გათვალისწინებით, მხოლოდ აშშ-ში მომუშავე კომპანიების მცირე ჯგუფს, ისიც სატესტო რეჟიმში მისცა.

ესპანეთში გამართულ ღონისძიებაზე ლაგარდმა აღნიშნა, რომ Mythos-ის ირგვლივ არსებული ვითარება აშშ-სა და დანარჩენ მსოფლიოს შორის „თანაბარ პირობებს“ არღვევს. მისი თქმით, ცენტრალური ბანკი აქტიურად ცდილობს იმ თავდაცვითი ზომების იდენტიფიცირებას, რომლებიც "ბოროტის მოსურნე სახელმწიფო აქტორების" მხრიდან შესაძლო იერიშების მოსაგერიებლად იქნება საჭირო. მნიშვნელოვანია ითქვას, რომ ECB-ის საბანკო ზედამხედველობის ორგანოებმა კომერციული ბანკების მზადყოფნის შემოწმება უკვე დაიწყეს.

ამასთან, ევროკომისიამ გაავრცელა ინფორმაცია, რომ Anthropic-ისგან Mythos-ის შესაძლებლობების შესახებ დეტალური მონაცემები მიიღო.

ცნობისთვის, Anthropic-ი ხელოვნური ინტელექტის სფეროში მომუშავე ერთ-ერთი წამყვანი ამერიკული ლაბორატორიაა, რომლის შეფასებაც ამჟამად $1.2 ტრილიონს აღწევს.